فرمان الہی
نماز کے اوقات
کراچی (ٹی وی رپورٹ) جیو کے پروگرام ’’آج شاہزیب خانزادہ کے ساتھ‘‘میں گفتگو کرتے ہوئے سابق وزیر خزانہ مفتاح اسماعیل نے کہاہے کہ معاشی استحکام حقیقی ہے اس میں شک نہیں،حکومت نے کسی قسم کا ریفارم نہیں کیا اور وقت ضائع کیا ہے،سینئر تجزیہ کار شہزاد اقبال نے کہا کہ نہ تو اسٹیبلشمنٹ اپنی پوزیشن سے ہٹ کر کوئی ڈیل کرے گی اور بظاہر ایسا لگ رہا ہے کہ عمران خان بھی نہیں کریں گے ، سینئر تجزیہ کار عاصمہ شیرازی نے کہا کہ تحریک انصاف کے لیے راہیں نکلنے کے مواقع موجود تھے اور ابھی بھی نکل سکتی ہیں لیکن سب سے بڑی رکاوٹ اس میں تحریک انصاف خود نظر آتی ہے۔سابق وزیر خزانہ مفتاح اسماعیل نے کہا کہ معاشی استحکام حقیقی ہے اس میں شک نہیں ہے دنیا بھر میں تیل کی قیمت کم ہوئی ہے دیگر چیزوں کی بھی چیزیں کم ہوئی ہیں تو جو فارن ایکسچینج کی ضرورت ہوتی ہے اس میں ڈالر بچ جاتے ہیں جس کی وجہ سے کرنٹ اکاؤنٹ سرپلس بھی ہو رہا ہے ریزو بھی بڑھ رہے ہیں جب تک تیل کی قیمت سستی رہے گی تو پاکستان کی معیشت بڑی وائبل ہے۔
