فرمان الہی
نماز کے اوقات
کراچی/اسلام آباد (اسٹاف رپوٹر/نمائندہ جنگ / ایجنسیاں) اسٹیٹ بینک کو بین الاقوامی مالیاتی فنڈ کے توسیعی فنڈ سہولت پروگرام کے تحت760ملین اسپیشل ڈرائنگ رائٹس یعنی تقریباً 1.023 ارب امریکی ڈالر کی دوسری قسط موصول ہو گئی ہےجبکہ عالمی شہرت یافتہ مالیاتی جریدے بیرنز (Barronʼs)نے پاکستان کی حالیہ معاشی کارکردگی کو معاشی کرشمہ قرار دیتے ہوئے کہا ہے کہ پاکستان میں سالانہ40فیصد مہنگائی، اب تقریبا صفر ہو چکی ہے‘ پاکستان کی طرف توجہ نہ دی توشاید سرمایہ کاروں کو پچھتانا پڑے ۔بیرنزنے اپنی رپورٹ میںکہاہے کہ پاکستان اقتصادی بحالی کی راہ پر غیر معمولی کامیابی سے گامزن ہے‘حالیہ پاک بھارت کشیدگی کے باوجود پاکستان کی معیشت پر اس کا کوئی منفی اثر نہیں پڑے گا۔رپورٹ میں مزید کہا گیا ہے کہ موجودہ حالات نے وزیراعظم شہباز شریف اور ان کے فوجی اتحادیوں کو معیشت کی بہتری کے لیے ایک مضبوط اور مثبت محرک فراہم کیا ہے۔رپورٹ میں نمایاں کامیابیوں کا ذکر کرتے ہوئے بتایا گیا ہے کہ پاکستان کا اسٹاک انڈیکس تین گنا تک بڑھ چکا ہے جبکہ 2031میں میچور ہونے والے پاکستانی یورو بانڈز کی قیمت 40سینٹ سے بڑھ کر80سینٹ تک پہنچ گئی ہے۔
