فرمان الہی
نماز کے اوقات
برطانوی وزیرِاعظم کیئر اسٹارمر اور فرانسیسی صدر ایمانویل میکرون نے غیرقانونی طور پر چھوٹی کشتیوں کے ذریعے انگلینڈ آنے والوں کو روکنے کے لیے ’نئی روک تھام‘ پر اتفاق کیا ہے۔
لندن میں فرانسیسی صدر نے کیئر اسٹارمر سے ملاقات کی، دونوں رہنماؤں نے غیرقانونی طور پر برطانیہ میں داخل ہونے والوں کے خلاف کارروائی پر بات چیت کی اور ’ون اِن، ون آؤٹ‘ اسکیم پر اتفاق کیا۔
اس اسکیم سے مراد جو پناہ گزین غیر قانونی طریقے سے برطانیہ آئیں گے، انہیں فرانس واپس بھیجا جائے گا اور اس کے بدلے میں برطانیہ قانونی طور پر فرانس میں موجود اُتنی ہی تعداد میں پناہ کے متلاشی افراد کو قبول کرے گا۔
میکرون نے اس منصوبے پر ابھی حامی نہیں بھری، کچھ یورپی ممالک جیسے اسپین، اٹلی، یونان، قبرص اور مالٹا نے اس اسکیم کی مخالفت کی ہے، کیونکہ انہیں خدشہ ہے کہ یہ جنوبی یورپ میں غیر قانونی ہجرت کو مزید بڑھا دے گا۔
خبر رساں اداروں کے مطابق آج اسٹارمر اور میکرون ایک مزید باضابطہ سربراہی اجلاس میں شرکت کریں گے، جہاں ان مذاکرات کے مزید نتائج سامنے آنے کی توقع ہے۔
وزیراعظم ہاؤس کے بیان کے مطابق دونوں رہنماؤں نے برطانیہ اور فرانس کے قریبی تعلقات کو سراہا اور اس بات پر اتفاق کیا کہ وہ یوکرین کی مدد، دفاعی تعاون، تجارت اور سرمایہ کاری میں مل کر کام جاری رکھیں گے۔
