فرمان الہی
نماز کے اوقات
اسلام آباد (نمائندگان خصوصی ) وفاقی وزیر داخلہ محسن نقوی نےتہران میں ایران کے صدر مسعود پزشکیان سے اہم ملاقات کی۔جس میں باہمی دلچسپی کے امور۔ پاک ایران تعلقات اور دوطرفہ تعاون پر تبادلہ خیال کیا گیا۔ ایرانی صدر نے اس موقع پر کہا کہ وہ پاکستان کی حمایت کبھی نہیں بھول سکتے، ا سرائیلی مسلط کردہ جنگ میں پاکستان کی حمایت پر شکر گزار ہیں، صہیونی حکومت مسلم ممالک کے درمیان تقسیم اور کمزوری پیدا کرنے کی کوشش کر رہی ہے۔ اسلامی ممالک کے درمیان اتحاد اور ہم آہنگی ناگزیر ہے محسن نقوی نے کہا کہ ایران پر حملے کی ہر فورم پر مذمت کی ، جنگ ہو یا امن پاکستان ایران ایک دوسرے کے ساتھ کھڑے ہیں، انہوں نے ایرانی صدر مسعود پزشکیان کو جنگ میں عظیم فتح کی مبارک باد دی۔وزیر داخلہ محسن نقوی نے کہا کہ ایران کے سپریم لیڈر سمیت پوری قوم نے جارحیت کا ڈٹ کر مقابلہ کیا، ایرانی سپریم لیڈر آیت اللہ خامنہ ای کی دانشمندانہ قیادت اور آپ کی بہترین حکمت عملی نے جنگ میں فیصلہ کن کردار ادا کیا، جو امت مسلمہ کے لیے باعثِ فخر ہے۔ وزیر داخلہ محسن نقوی نے کہا کہ پاکستان نے ایران پر حملے کی ہر فورم پر پر زور مذمت کی، پاکستانی پارلیمنٹ نے سب سے پہلے ایران پر جنگ مسلط کرنے کے خلاف مذمتی قرارداد منظور کی اور ایران کے اپنے دفاع کے جائز حق کی حمایت کی۔ وزیر داخلہ محسن نقوی نے وزیراعظم شہباز شریف کی جانب سے ایرانی صدر مسعود پزشکیان کو نیک خواہشات اور احترام کا پیغام پہنچایا۔ ایرانی صدر مسعود پزشکیان نے کہا کہ پاکستان کے ساتھ اپنے تعلقات کو انتہائی اہمیت دیتے ہیں۔
