فرمان الہی
نماز کے اوقات
کراچی (اسٹاف رپورٹر)داؤد یونیورسٹی آف انجینئرنگ اینڈ ٹیکنالوجی نے دارالسکون میں خصوصی بچوں کے لیے ایک خصوصی تقریب کا اہتمام کرکے معرکہ حق اور یوم آزادی کا دوسرا دن انتہائی جوش و جذبے سے منایا۔ دارالسکون کے آڈیٹوریم میں وائس چانسلر انجینئر پروفیسر ڈاکٹر ثمرین حسین (ستارہ امتیاز، تمغہ امتیاز) کے ساتھ طلباء، اساتذہ، افسران اور عملہ نے تقریب کی میزبانی کی۔ انچارج دارالسکون سسٹر کیتھرین ولسن، چیف ایگزیکٹو آفیسر سایو پریرا، ری ہیبلیٹیشن ڈیپارٹمنٹ کی سربراہ سمیرا فاضل اور منیجر کارپوریٹ اینڈ ڈونر ریلیشنز والٹر جیمز بورنشین نے یونیورسٹی کے وفد کا استقبال کیا۔ تقریب میں 200 سے زائد خصوصی بچوں اور مختلف عمر کے افراد نے شرکت کی، جس کی مہمان خصوصی پاکستان ہندو کونسل کے سرپرست اعلیٰ ڈاکٹر رمیش کمار کی موجودگی میں ہوئی۔ بین المذاہب ہم آہنگی کے احترام کے لیے تقریب کا آغاز قرآن پاک کی چند آیات، بائبل اور گیتا کی تلاوت سے ہوا۔ تقریب کی خاص بات خصوصی بچوں کی طرف سے اپنی صلاحیتوں کا مظاہرہ کرتے ہوئے ایک ٹیبلو ڈسپلے تھا۔ یونیورسٹی کے طلباء اور فیکلٹی نے خصوصی بچوں میں کھلونے، کھانے اور دیگر تحائف تقسیم کرکے خوشی اور مسکراہٹیں بکھیر دیں۔ تقریب کا اختتام خصوصی بچوں کی جانب سے ثقافتی رقص پرفارمنس اور قومی گیت گا کر ہوا جس میں پاکستان کی مسلح افواج بالخصوص ایئر فورس اور فیلڈ مارشل سید عاصم منیر کو خراج تحسین پیش کیا گیا۔ داؤد یونیورسٹی کے عہدیداروں نے خصوصی بچوں کے اسپیشل وارڈ کا بھی دورہ کیا اور انہیں معرکہ حق اور یوم آزادی کی خوشیوں میں شامل کرنے کیلئے ان میں تحائف تقسیم کئے ۔ داؤد یونیورسٹی آف انجینئرنگ نے خصوصی بچوں کے ساتھ قومی تقریب مناکر اپنے اس عزم کا اعادہ کیا ہے کہ مرکزیت کے فروغ اور معاشرے کے پسماندہ طبقات کو ساتھ لیکر چلنا ہے ۔
