فرمان الہی
نماز کے اوقات
اسلام آباد(نیوزرپورٹر/جنگ نیوز) وزیر اعظم محمدشہباز شریف نےآرمی راکٹ فورس کمانڈ کی تشکیل کا اعلان کرتے ہوئے کہاہے کہ آرمی راکٹ فورس کمانڈ ہماری جنگی صلاحیت کو مزید مضبوط کرے گی‘تمام سیاسی جماعتوں‘ اسٹیک ہولڈرز اور سول سوسائٹی کو میثاق استحکام پاکستان کا حصہ بننے کے لیے ایک بار پھر دعوت دیتا ہوں‘وقت آچکا ہے کہ ہم سیاسی تقسیم، ذاتی مفادات اور کھوکھلے نعروں سے آگے بڑھ کر پاکستان کے لیے اجتماعی سوچ اپنائیں‘ اب ہم کسی نئے فتنےکو جگہ نہیں دیں گے‘ پاکستان میں سب کو احتجاج کا حق ہے لیکن جلاؤ گھیراؤکا نہیں‘ تنقید کا حق ہے لیکن توہین اور گالی کا نہیں‘ سیاست کا حق ہے لیکن ریاست کے خلاف بغاوت کا نہیں‘ ہم اس کو کسی صورت پنپنے نہیں دیں گے‘معرکہ حق میں پاکستان نے بھارت کو تاریخ کا وہ سبق سکھایا جواس کی آنے والی نسلیں بھی قیامت تک یاد رکھیں گی ‘ فیلڈ مارشل سید عاصم منیر قوم کا وہ عظیم بیٹا ہے جس نے بھارت کے جنگی جنون کے خلاف ایسی دلیرانہ اور دانشمندانہ حکمتی عملی بنائی جس کا اعتراف دوست اور دشمن سب کرتے ہیں‘صدرٹرمپ کا بھی شکریہ ادا کرتا ہوں جنہوں نے جنگ بندی کے لیے مثبت کردار ادا کیا‘ مجھے امید ہے کہ ٹرمپ کشمیر کا مسئلہ حل کروانے میں اپنا کردار اد اکریں گے۔ان خیالات کا اظہار انہوں نےاسپورٹس کمپلیکس اسلام آباد میں میں یوم آزادی اورمعرکہ حق میں فتح کی پروقار اور رنگارنگ تقریب سے خطاب کرتے ہوئے کیا۔ تقریب میں صدر آصف علی زرداری‘فیلڈ مارشل سید عاصم منیر‘دوست ممالک کے سفرا ء سمیت اعلیٰ سول و عسکری قیادت نے شرکت کی۔یوم آزادی کی مناسب سے ملک بھر میں جشن منایاگیاجبکہ اس حوالے سے قومی اسمبلی میں قرارداد بھی منظورکی گئی ۔اپنے خطاب میں شہباز شریف کا کہناتھاکہ آرمی راکٹ فورس جدید ٹیکنالوجی کی حامل، دشمن کو ہر سمت سے نشانہ بنانے کی صلاحیت رکھتی ہے‘ آرمی راکٹ فورس کمانڈ ہماری جنگی صلاحیت کو مزید مضبوط کرے گی۔ وقت آچکاہے کہ ہم سیاسی تقسیم، ذاتی مفادات اور کھوکھلے نعروں سے آگے بڑھیں، ہم آگے بڑھ کرپاکستان کے لیے اجتماعی سوچ اپنائیں‘ آج کے عظیم دن پر تمام سیاسی جماعتوں‘ اسٹیک ہولڈرز اور سول سوسائٹی کو میثاق استحکام پاکستان کا حصہ بننے کے لیے دعوت دیتا ہوں ۔وزیراعظم کا کہنا تھا کہ یہ میثاق معیشت کی بحالی کا منصوبہ نہیں وسیع ترقومی مفاد کی بنیاد ہے، چاہتے ہیں کہ پوری دنیا دیکھ سکےکہ ہمارے اختلافات اپنی جگہ مگر پاکستان کی خاطرہم ایک ہیں۔ہم نے جشن آزادی کو معرکہ حق کا نام دیا ہے، 4 دن کے اندربھارت کا غرور مٹی میں مل گیا، بھارت کی آنے والی نسلیں اس شکست کویاد رکھیں گی، بھارت نے پاکستان پر حملہ کیا، اس کو گھمنڈ تھا کہ اپنی جنگی طاقت سے پاکستان کو زیرکرےگا، معرکہ حق نے ثابت کیا کہ ہم اس آزادی کی حفاظت کرنے کی طاقت رکھتے ہیں، ہماری ایٹمی طاقت کسی طورپرجارحانہ سوچ نہیں رکھتی، ہم نے بھارت کی جوہری طاقت کےمقابلے میں ایٹمی طاقت کے حصول کا راستہ اپنایا۔ان کا کہنا تھا کہ ہمارے دوست ممالک نے مشکل گھڑی میں ہمارا حوصلہ بڑھایا۔ چین، سعودی عرب، ترکیہ، آذربائیجان، یو اے ای اور ایران نے پاکستانی مؤقف کی کھل کرحمایت کی۔وزیراعظم کا کہنا تھا کہ پاکستان بحران سے نکل کر نئے معاشی دور میں داخل ہو رہا ہے، مہنگائی کی سطح جو 34 فیصد پر پہنچ گئی تھی آج 5 فیصد پر آگئی ہے، شرح سود 21 فیصد سے 11 فیصد پر آگئی ہے، یہ صرف آغاز ہے، مستقبل کی راہیں ہمیں شبانہ روز محنت سے طے کرنی ہیں، فیلڈ مارشل سید عاصم منیر کا شکریہ جنہوں نے سول حکومت سے بھرپور تعاون کیا، عدلیہ کے تعاون سے قومی خزانے میں 100 ارب روپے سے زیادہ رقوم جمع ہوئیں۔وزیراعظم کا مزید کہنا تھا کہ غزہ اور کشمیر میں بے گناہوں کا خون بہتا ہے، فلسطین اور کشمیر کے عوام کے ساتھ حقوق حاصل ہونے تک کھڑے رہیں گے۔تقریب کے دوران تینوں مسلح افواج پر مشتمل میوزک بینڈ نے شاندار مارچ پاسٹ کا مظاہرہ کیا جب کہ پنجاب رینجرز اور ایف سی خیبر پختونخوا کے دستوں نے بھی مارچ پاسٹ کا مظاہرہ کیا۔پروقار تقریب میں پریڈ کمانڈر لیفٹیننٹ کرنل محمد عمر اعوان نے صدر مملکت آصف علی زرداری کو پریڈ پیش کی‘پریڈ نے مہمان خصوصی کو صدر سلام پیش کیا۔تقریب میں ترکیہ اور آذربائیجان کی مسلح افواج کے دستے نے بھی شرکت کی۔تقریب میں ترکیہ اور آذربائیجان کی مسلح افواج کے دستوں نے مارچ پاسٹ کیا، دونوں برادر ممالک کی افواج کے دستے سلامی کے چبوترے سے گزرے تو عوام کی جانب سے بھی ان کا بھر پور استقبال کیا گیا اور انہیں خراج تحسین پیش کیا گیا.
