فرمان الہی
نماز کے اوقات
کراچی (اسٹاف رپورٹر )ملک بھر کی طرح کراچی میں بھی پاکستان کا 78واں یوم آزادی وجشن معرکہ حق ملی جوش و جذبے اور اس عہد تجدید کے ساتھ منایا گیا کہ ملک کو ایک حقیقی اسلامی فلاحی ریاست بنانے کے لیے تحریک پاکستان کے جذبے سے کام کیا جائے گا،رواں سال یوم آزادی کو معرکہ حق کی عظیم فتح سے منسوب کیا گیا ہے،کراچی میں قومی جوش و جذبے اور احترامِ کے ساتھ تقاریب کا انعقاد کیا گیا، دن کا آغاز نماز فجر کے ساتھ ہوا ، مساجد میں قرآن خوانی کی گئی اور وطن عزیز کی سلامتی، ترقی، خوشحالی اور اتحاد کے لیے خصوصی دعائیں کی گئیں۔پاک فوج کے چاق و چوبند دستے نے یوم آزادی کی صبح دشمن کو پیغام دینے والے انداز میں نعرہ تکبیر اللہ اکبر کے فلک شگاف نعروں کے ساتھ صوبائی دارالحکومت کراچی میں 21 توپوں کی سلامی دی،یہ سلامی ملکی خودمختاری، قومی وقار، اور افواجِ پاکستان کی تیاری و قربانی کے عزم کی غماز سمجھی جاتی ہے،گورنر سندھ کامران خان ٹیسوری ،وزیراعلی سندھ سید مراد علی شاہ ،صوبائی کابینہ، میئر کراچی مرتصی ٰوہاب،ایم کیوایم پاکستان کے سربراہ و وفاقی وزیر ڈاکٹرخالدمقبول صدیقی ،تینوں مسلح افواج کے نمائندوں اور دیگر افراد نے مزار قائد اعظم پر حاضری دی،پھولوں کی چادر چڑھائی اور فاتحہ خوانی کی،اس موقع پر پرچم کشائی بھی کی گئی،جشن آزادی و معرکہ حق کے موقع پر شہری سڑکوں پر اُمڈ آئے، فضا پاکستان زندہ باد کے نعروں سے گونج اٹھی،چھوٹی بڑی ریلیوں اور مختلف ثقافتی شوز کا انعقاد کیا گیا، شہریوں نے ملی نغموں اور ڈھول کی تھاپ پر بھنگڑے ڈالے،دن بھر مزار قائداعظم پر مختلف سیاسی ،مذہبی جماعتوں ،سماجی تنظیموں اور شہریوں کی جانب سے حاضری دینے کا سلسلہ جاری رہا ، شہر کو قومی پرچموں اور برقی قمقموں سے سجایا گیا تھا، مختلف تقریبات میں مقررین نے آزادی کی نعمت پر شکر گزاری اور اس کی حفاظت کے لیے قومی اتحاد، یکجہتی اور قربانی کے جذبے کو وقت کی اہم ضرورت قرار دیا اور مسلح افواج کی کامیابی پر ان کو زبردست خراج تحسین پیش کیا گیا ۔
