فرمان الہی
نماز کے اوقات
اسلام آباد( نیوز رپورٹر)چیف آف آرمی سٹاف فیلڈ مارشل سید عاصم منیر نشان امتیاز (ملٹری)، ہلال جرات نے قصور سیکٹر اور جلال پور پیر والا ملتان میں فلڈ ریلیف کیمپس کا دورہ کیا ،انہوں نے سیلاب کی موجودہ صورتحال اور جاری امدادی سرگرمیوں کا جائزہ لیا۔سول انتظامیہ کیساتھ گفتگو کرتے ہوئے انہوں نے گڈ گورننس اور عوامی خدمت پر مبنی ترقی کی اہمیت پر زور دیا اور کہا کہ ریاست ہر سال قیمتی جانوں اور املاک کے نقصان کی متحمل نہیں ہو سکتی ۔آرمی چیف نے امدادی کارروائیوں میں مصروف فوجی جوانوں ، ریسکیو 1122 اور پولیس اہلکاروں سے ملاقات بھی کی اور انتہائی مشکل حالات میں قوم کی خدمت کیلئے ان کے بلند حوصلے ، آپریشنل تیاری اور ثابت قدمی کو سراہا، پاک فوج کے شعبہ تعلقات عامہ (آئی ایس پی آر) کے مطابق آرمی چیف کا قصور اور ملتان کے سیلاب سے متاثرہ علاقوں کا دورہ سول انتظامیہ اور فوج کے درمیان ہم آہنگی بڑھانے پر مرکوز تھا تاکہ متاثرہ آبادی کیلئے موثر امداد کو یقینی بنایا جاسکے۔اس موقع پر چیف سیکرٹری پنجاب اور سول انتظامیہ کے دیگر اعلیٰ حکام بھی موجود تھے۔ چیف آف آرمی سٹاف کو سیلاب سے متاثرہ علاقوں میں بچاؤ اور امدادی کارروائیوں کے بارے میں موجودہ صورتحال پر تفصیلی بریفنگ دی گئی۔ انہوں نے سیلاب سے متاثرہ کمیونٹیز کو درپیش چیلنجز سےنمٹنے کیلئے مربوط سول ملٹری کاوشوں کی اہمیت کو اجاگر کیا اور عوامی بہبود کیلئے تمام اقدامات کی معاونت کیلئے پاک فوج کے غیر متزلزل عزم کا اعادہ بھی کیا۔ آر می چیف نے پاک فوج اور سول انتظامیہ کی جانب سے سیلاب سے ریسکیو کئے گئے متاثرین سیلاب کیساتھ گفتگو کے دوران ان کی آباد کاری اور بحالی میں تعاون جاری رکھنے کا یقین دلایا۔ انہوں نے لوگوں کو بروقت ریلیف اور امداد کی فراہمی کیلئے سول انتظامیہ کے ساتھ قریبی رابطوں کے حوالے سے ان کی 24 گھنٹے جاری کوششوں کی بھی تعریف کی۔انھوں نے نقصان کی صورتحال اور جاری امدادی سرگرمیوں کا جائزہ لینے کیلئے لاہور، قصور ، ملتان اور جلال پور پیر والا کے ساتھ ساتھ سیلاب سے متاثرہ علاقوں کا فضائی معائنہ بھی کیا۔ قبل ازیں سیلاب سے متاثرہ علاقوں میں پہنچنے پر فیلڈ مارشل کا استقبال لاہور اور ملتان کے کور کمانڈرز نے کیا۔
