فرمان الہی
نماز کے اوقات
حکومتی فنڈنگ سے متعلق بل امریکی سینیٹ سے منظور نہ کرایا جاسکا جس کی وجہ سے امریکا میں شٹ ڈاؤن کا خدشہ بڑھ گیا۔
امریکا کے ایوان نمائندگان اور سینیٹ دونوں ہی پر صدر ٹرمپ کی جماعت ری پبلکنز کا کنٹرول ہے مگر سو رکنی سینیٹ میں بل منظور کرانے کیلئے اسے ساٹھ ووٹ درکار ہیں جبکہ حکمراں جماعت کے پاس صرف تریپن ووٹ ہیں۔
ڈیموکریٹک بل سینیٹ پہلے ہی مسترد کرچکی ہے جس کی حمایت میں سنتالیس اور مخالفت میں تریپن ووٹ پڑے تھے۔
اس کے بعد ری پبلکنز کی جانب سے پیش بل پر ووٹنگ ہوئی مگر پانچ ووٹوں کی کمی کے سبب یہ بل بھی مسترد کردیا گیا۔
رینڈ پال واحد ری پبلکن ہیں جنہوں نے اپنی پارٹی کے بل کیخلاف ووٹ دیا۔
واضح رہے کہ امریکا میں نیا مالی سال یکم اکتوبر سے شروع ہوتا ہے اور اس بار یہ بغیر بجٹ منظوری کے شروع ہونے کا خدشہ ہے۔
اگر کیپٹل ہل مخصوص مدت کیلئے حکومتی فنڈنگ سے متعلق عارضی بل بھی منظور نہ کرسکی تو وفاقی ایجنسیز کے شٹ ڈاؤن کرنا پڑیں گی۔
امریکا میں اس سے پہلے سب سے طویل شٹ ڈاؤن پینتیس روز تک جاری رہ چکا ہے اور یہ ڈونلڈ ٹرمپ کے پہلے دور صدارت میں ہوا تھا۔
