فرمان الہی
نماز کے اوقات
لندن (آئی این پی ) سابق وزیر اعظم عمران خان کی سابقہ اہلیہ جمائمہ کی والدہ اور برطانوی سماجی شخصیت لیڈی اینابیل گولڈ سمتھ 91 سال کی عمر میں انتقال کر گئی ہیں۔
لیڈی اینابیل 11جون 1934ء کو لندن میں پیدا ہوئیں۔ وہ برطانوی اشرافیہ کے ایک معزز خاندان سے تعلق رکھتی تھیں، ان کی پہلی شادی مارک برلی سے ہوئی جنہوں نے لندن میں مشہور نائٹ کلب اینابیلز (Annabels) قائم کیا جس کا نام انہوں نے اپنی اہلیہ کے نام پر رکھا۔
بعد ازاں، انہوں نے معروف بزنس مین سر جیمز گولڈ سمتھ سے شادی کی۔ لیڈی اینابیل کے تین بچے ہیں، جمائمہ، زیک، اور بین گولڈ سمتھ، ان کی بیٹی جمائمہ گولڈ سمتھ نے 1995ء میں عمران خان سے شادی کی تھی یوں لیڈی اینابیل کچھ عرصہ کے لیے عمران خان کی ساس رہیں۔
لیڈی اینابیل لندن کی سماجی اور ثقافتی تقریبات میں نمایاں مقام رکھتی تھیں۔ وہ کئی دہائیوں تک برطانوی اعلی طبقے کی نمایاں چہروں میں شمار ہوتی رہیں اور ان کا نائٹ کلب اینابیلز عالمی شہرت رکھتا تھا۔
انہوں نے اپنی زندگی پر ایک کتاب ’Annabel: An Unconventional Life‘ بھی تحریر کی جس میں انہوں نے اپنی غیر معمولی زندگی کے تجربات اور برطانوی سماجی دنیا کے رنگ بیان کیے۔ان کے خاندان نے ان کی وفات پر گہرے دکھ کا اظہار کیا ہے۔
برطانوی میڈیا نے انہیں ’ایک عہد کی علامت‘ قرار دیتے ہوئے خراجِ عقیدت پیش کیا ہے۔پاکستان میں بھی ان کے انتقال کی خبر کو توجہ ملی ہے کیونکہ ان کا تعلق براہِ راست عمران خان کی سابق اہلیہ جمائما گولڈ سمتھ کے ذریعے پاکستان سے جڑا رہا۔
