فرمان الہی
نماز کے اوقات
اسلام آباد( طاہر خلیل، جنگ نیوز )الیکشن کمیشن نے دھمکی آمیز بیانات کا نوٹس لیتے ہوئے وزیر اعلیٰ خیبرپختونخوا سہیل آفریدی اور ہری پور سے امیدوار مسماۃ شہرناز عمر ایوب کو آج طلب کرلیا، الیکشن کمیشن نے ہری پور ضمنی الیکشن کیلئے فوج تعیناتی کی سفارش بھی کردی ہے، الیکشن کمیشن نے فوری طور پر سیکرٹری وزارت داخلہ کو چِٹھی ارسال کی جائے کہ حلقہ میں فوج اور وفاقی سیکورٹی اداروں کی مدد سے فول پروف سیکورٹی انتظامات کئے جائیں، تاکہ ڈسٹرکٹ ریٹرننگ آفیسر ، ریٹرننگ ، دیگر انتخابی اہلکاروں ، ووٹروں اور پبلک کے تحفظ کو یقینی بنایا جاسکے اور انتخابی عملے کی پولنگ سٹیشنز کی طرف اور الیکشن کے بعد ROآفس کی طرف اُنکی اور الیکشن میٹریل کی ترسیل کو تحفظ دیا جاسکے۔ کمیشن نے یہ بھی فیصلہ کیا کہ ضمنی انتخابات کے دوران کسی فرد، شخصیت یا پبلک آفس ہولڈر نے الیکشن کےپُرامن انعقاد میں مداخلت یا خلل ڈالنے کی کوشش کی تو اُنکے خلاف سخت قانونی کاروائی عمل میں لائے جائے گی،وزیراعلیٰ خیبرپختونخوا سہیل آفریدی نے کہا ہے کہ ان کے بیان کو توڑ مروڑ کر پیش کیا گیا ہے ِ ، انہوں نے کہا کہ میں نے کسی قسم کی دھمکی نہیں دی ہے۔تفصیلات کے مطابق الیکشن کمیشن نے وزیر اعلیٰ پختونخوا سہیل آفریدی کےحویلیاں جلسے کے خطا ب کے دوران دیئے گئے بیان جس میں اُنہوں نے ضلعی انتظامیہ ، پولیس اور الیکشن میں تعینات عملہ کو دھمکایا اور جلسے میں موجود پبلک اور عمومی طور پرعوام کو اُکسانے پر نوٹس لیا ہے، اس موقع پر اُن کے ساتھ ایک مفرور مجر م بھی کھڑاتھا جس کی زوجہ الیکشن میں حصہ لے رہی ہیں۔ صوبے کے چیف ایگزیٹو کے اس غیر ذمہ دارانہ اور رویہ کی وجہ سے نہ صرف این اے 18 ہری پور میں پُرامن ضمنی ا نتخاب کا انعقاد مشکل ہو گیا ہے ، بلکہ ضلعی انتظامیہ ، پولیس اور الیکشن ڈیوٹی پر مامور عملہ اورووٹروں کی جان کو بھی خطرہ لاحق ہواہے۔ کمیشن نے حالات کی نزاکت کو سامنے رکھتے ہوئے صوبائی الیکشن کمشنر خیبر پختو نخوا کو حکم دیا کہ وہ اس سلسلے میں فوری طور پر چیف سیکرٹری اور آئی جی سے میٹنگ کریں اورضروری حفاظتی اقدامات کرنے کے بعد ا پنی رپورٹ الیکشن کمیشن کو پیش کریں۔الیکشن کمیشن نے معاملے کی سنگینی کو مدِنظر رکھتے ہوئے چیف منسٹر خیبر پختونخوا ہ سہیل آفریدی اور امیدوار مسماۃ شہرناز عمر ایوب کو الیکشنز ایکٹ 2017ء اور ضابطۂ اخلاق کی خلاف ورزی پر آج مورخہ 21نومبر 2025 کو طلب کرتے ہوئے نوٹس جاری کر دیے ہیں۔
