فرمان الہی
نماز کے اوقات
کراچی (اسٹاف رپورٹر) قائداعظم ٹرافی کرکٹ ٹورنامنٹ کے نویں اور آخری راؤنڈ کے پہلے دن فاٹا کے حیات اللہ کی تباہ کن بولنگ جبکہ روحیل نذیر، امام الحق اور اویس ظفر کی سنچریاں نمایاں رہیں ۔ راولپنڈی میں سیالکوٹ پہلی اننگز میں 176 رنز بناکر آؤٹ ہوگئی۔ مہران ممتاز نے 70 رنز بنائے۔ محمد عمر نے40 رنز دے کر 5 اور کاشف بھٹی نے4 شکار کیے ۔ کراچی بلوز نے کھیل ختم ہونے پر 3 وکٹوں پر144 رنز بنائے تھے۔ شان مسعود 60 رنز پر ناٹ آؤٹ ہیں۔ پشاور میں لاہور وائٹس 205 رنز بناکر آؤٹ ہوگئی۔ قاسم اکرم نے 54 رنز بنائے۔ آف اسپنر حیات اللہ نے 78 رنز دے کر 7 وکٹیں حاصل کیں۔ فاٹا نے کھیل ختم ہونے پر 3 وکٹوں پر 86 رنز بنائے تھے۔ اسلام آباد میں فیصل آباد نے بہاولپور کے خلاف 9 وکٹوں پر 305 رنز بنائے تھے۔ اویس ظفر نے 140 ، حسن رضا اور رئیس احمد نے 53 ،53 رنز اسکور کیے ۔ اسلام آباد میں ہوم سائیڈ نے پشاور کے خلاف پہلی اننگز میں 5 وکٹوں پر 346 رنز بنائے تھے ۔ روحیل نذیر 113 پر ناٹ آؤٹ ہیں۔ شامل حسین 76، نصیراللہ نے 73 رنز بنائے ۔ ایبٹ آباد میزبان ٹیم میں ملتان نے ایبٹ آباد کیخلاف پہلی اننگز میں 5 وکٹوں پر 360 رنز بنائے تھے۔ امام الحق181 ، شرون سراج نے83 رنز بنائے۔
