• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

پنجاب، پتنگ بازی نیا آرڈیننس خطرناک ڈور پر پابندی، خلاف ورزی پر 7 سال قید

آج کا اخبار
اہم خبریں
29 نومبر ، 2025
لاہور(آصف محمود بٹ )پتنگ بازی نیا آرڈیننس، خطرناک ڈور پر پابندی،خلاف ورزی پر 7 سال قید۔مخصوص علاقوں اور اوقات میں ڈپٹی کمشنر کی اجازت سے  مشروط،50 لاکھ  جرمانہ،  عدم ادائیگی پر مزید دو سال کی سزا ہوگی۔بچوں سے جوینائل جسٹس سسٹم ایکٹ کے تحت نمٹا جائے گا، بار بار خلاف ورزی پر  لاکھ روپے جرمانہ ، مخبروں کو انعامات ملیں گے  ۔پتنگ بازی آرڈیننس 2025کو اگلے ہفتے اسمبلی کا سیشن ختم ہوتے ہی نافذ کرنے کی تیاری کی جا رہی ہے۔ اس بات پر زور دیا گیا ہے کہ غیر محفوظ پتنگ بازی کے طریقوں سے ہونے والی چوٹوں، اموات اور املاک کو پہنچنے والے نقصان کو روکنے کے لیے سخت کارروائی کی ضرورت ہے۔آرڈیننس میں خلاف ورزیوں پر سخت سزائیں مقرر کی گئی ہیں۔ غیر قانونی طور پر پتنگ اڑانے یا اس کی معاونت کرنے والے کو تین سے پانچ سال تک قید اور 20 لاکھ روپے تک جرمانہ ہو سکتا ہے۔ قانون میں پتنگ بازی کے منظور شدہ مواد تیار کرنے والوں، تاجروں اور بیچنے والوں کی رجسٹریشن کے لیے ایک تفصیلی نظام وضع کیا گیا ہے۔ کوئی بھی شخص مقررہ فیس کی ادائیگی پر ڈپٹی کمشنر یا مجاز افسر کے پاس رجسٹریشن کے بغیر قابل اجازت مواد تیار یا فروخت نہیں کر سکے گا۔ خلاف ورزی کرنے والوں کو ایک سے پانچ سال تک قید یا ایک لاکھ سے پانچ لاکھ روپے تک جرمانہ ہو سکتا ہے۔ میٹل وائر، نائلون تندی ، یا تیز مانجھا کا استعمال، فروخت یا تیاری مکمل طور پر ممنوع رہے گی۔ اجازت یافتہ پتنگ بازی کے دنوں میں، اس ضلع میں موٹر سائیکل سواروں کے لیے مقرر کردہ حفاظتی تدابیر کے بغیر ڈرائیونگ کرنے کی اجازت نہیں ہو گی۔ذرائع کے مطابق اس آرڈ نینس کا مقصد جانوں کی حفاظت، پتنگ بازی کی صنعت کو ریگولیٹ کرنا، ثقافتی تقریبات کا محفوظ جشن یقینی بنانا، اور بھاری جرمانے اور وسیع شدہ نافذ کرنے والے اختیارات کے ذریعے خلاف ورزی کرنے والوں کو روکنا ہے۔
اہم خبریں سے مزید