• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ضلع دادو، محکمہ جنگلات کی کچے میں موجود 8 ہزار ایکڑ اراضی پر قبضے کا انکشاف

آج کا اخبار
اہم خبریں
29 نومبر ، 2025
دادو (نامہ نگار/جاوید ناریجو) دادو ضلع میں محکمۂ جنگلات کی کچے کے علاقے میں قائم 8ہزار 251 ایکڑ سرکاری اراضی پر قبضے کا انکشاف ہوا ہے اس سلسلے میں ڈپٹی کمشنر دادو کی زیرِ صدارت ایک اہم اجلاس ڈپٹی کمشنر آفس میں منعقد ہوا، جس میں سرکاری زمینوں پر غیرقانونی قبضوں کے خاتمے، ریکارڈ آف رائٹس کی جانچ اور جنگلاتی اراضی کے حفاظتی نظام میں شفافیت لانے سے متعلق امور پر تفصیلی غور کیا گیا۔ اجلاس میں محکمہ جنگلات اور محکمہ ریونیو کے افسران نے شرکت کی۔ اس موقع پر افسران نے ڈپٹی کمشنر دادو کو ضلع میں موجود جنگلاتی اراضی کی مجموعی صورتحال، ریکارڈ کے اندراج اور قبضوں کے چیلنجز کے حوالے سے بریفنگ دی۔ تفصیلات کے مطابق، ضلع دادو میں محکمہ جنگلات کی مجموعی 57ہزار 55ایکڑ اراضی موجود ہے، جس میں سے8ہزار251ایکڑ زمین پر قبضہ پایا گیا ہے۔ ذرائع کے مطابق یہ قبضے مبینہ طور پر سابق وزیر اور علاقے کے بااثر افراد نے قائم کر رکھے تھے۔ اجلاس میں حکام نے مزید بتایا کہ 2ہزار565ایکڑ سرکاری زمین غیرقانونی قبضہ مافیا سے واگزار کرا لی گئی ہے۔ اس پر ڈپٹی کمشنر دادو نے متعلقہ افسران کو ہدایت کی کہ جہاں بھی قبضے موجود ہوں، وہاں فوری کارروائی کا آغاز کیا جائے تاکہ سرکاری اراضی کو مکمل طور پر واگزار کرایا جاسکے۔
اہم خبریں سے مزید