فرمان الہی
نماز کے اوقات
کراچی (اسٹاف رپورٹر) آئی پی ایل کی ایک اور وکٹ گرگئی ۔ جنوبی افریقا کے فاف ڈوپلیسی کے بعد انگلش آل رائونڈر معین علی بھی آئی پی ایل چھوڑ کر پی ایس ایل کھیلنے کے لیے تیار ہوگئے۔ پی سی بی کا کہنا ہے کہ پی ایس ایل کی کشش اور کوالٹی کی وجہ سے، ایک اور بڑا نام شامل ہوگیا ۔ معین علی بھی نے آئی پی ایل چھوڑ کر پی ایس ایل کھیلنے کا فیصلہ کرلیا۔ معین علی کا کہنا ہے کہ یہ نئی شروعات کا وقت ہے۔ میں پی ایس ایل کے نئے دور میں شامل ہونے پر بہت زیادہ پرجوش ہوں۔ پی ایس ایل اپنے بہترین معیار اور ورلڈ کلاس ٹیلنٹ کی وجہ سے ٹی ٹوئنٹی میں ایک نمایاں مقام رکھتی ہے۔ پاکستان میں کھیلنا ہمیشہ اچھا رہا ہے یہاں اعلی معیار کی کرکٹ اور شائقین کا غیرمعمولی جوش وجذبہ قابل دید ہے اور آپ چاہتے ہیں کہ اپنی بہترین کارکردگی دکھائیں۔ میں ان تمام باتوں کا منتظر ہوں تاکہ بہترین یادیں میرے ساتھ رہیں ۔ میں ایک نئے اور خاص تجربے کے لیے تیار ہوں انشاء اللہ ۔ یاد رہے کہ اس سے قبل سابق جنوبی افریقی کپتان کا کہنا تھا کہ انہوں نے 14 سیزن کے بعد آئی پی ایل نیلامی میں اپنا نام نہ دینےکا فیصلہ کیا ہے۔پی ایس ایل سے متعلق فاف ڈو پلیسی کا کہنا تھا کہ اس سال میں نے ایک نیا چیلنج لینےکا فیصلہ کیا ہے، میں آنے والے پی ایس ایل سیزن میں کھیلوں گا۔ فاف ڈو پلیسی کا کہنا تھا کہ یہ میرے لیے ایک پرجوش اور نیا قدم ہے، میرے لیے کچھ نیا کرنے اور ایک کھلاڑی کے طور پر ترقی کرنےکا موقع ہے، پی ایس ایل بے پناہ صلاحیت اور توانائی سے بھرپور ہے۔اس سے قبل وہ کوئٹہ گلیڈی ایٹرز اور پشاور زلمی کی جانب سے پی ایس ایل کھیل چکے ہیں۔
