فرمان الہی
نماز کے اوقات
کراچی ( اسٹاف رپورٹر )کے الیکٹرک اور کانٹریکٹر کے درمیان ادائیگی کا تنازع ایک بار پھر عدالت میں پہنچ گیا۔ سندھ ہائیکورٹ نے جام صادق پل کی تعمیر کے دوران کے الیکٹرک کے انفرا اسٹرکچر کو تحفظ دیتے ہوئے پرانی تعمیرات کو مسمار کرنے سے روک دیا۔ سندھ ہائیکورٹ کے آئینی بینچ نے یلولائن پر نیوجام صادق پل کی تعمیر کے دوران کے الیکٹرک کے انفرااسٹرکچر کی منتقلی کے تنازع پر درخواست کی سماعت کی۔ کے الیکٹرک کے وکیل نے کہا کہ کسی بھی منصوبے کی تعمیر سے قبل یوٹیلیٹی انفرا اسٹرکچر کی منتقلی کی جاتی ہے،کے الیکٹرک اور کانٹریکٹر کے درمیان انفرااسٹرکچر کی منتقلی کیلئے معاہدہ طے پایا تھا، تعمیرات کے دوران کے الیکٹرک کے پول کو نقصان پہنچا جس سے مہران ٹان اور اطراف میں تین روز تک بجلی کی فراہمی معطل رہی۔ کے الیکٹرک کے وکیل نے بتایا کہ کانٹریکٹر کی جانب سے دئیے گئے چیک بھی بانس ہوگئے ہیں، پرانی تعمیرات مسمار کیے جانے کے دوران کے الیکٹرک کے انفرااسٹرکچر کو نقصان پہنچنے کا اندیشہ ہے، الیکٹرک کے انفرااسٹرکچر کو نقصان پہنچنے سے انڈسٹریل ایریا و دیگر علاقے متاثر ہوں گے۔عدالت نے کے الیکٹرک کے وکیل کے دلائل پر ڈی جی ماس ٹرانزٹ اتھارٹی کو ریکارڈ کے ساتھ طلب کرلیا۔
