فرمان الہی
نماز کے اوقات
کراچی (اسٹاف رپورٹر ) ساؤتھ پولیس نے نامورصحافی، تحریک خلافت اور تحریک آزادی کے رہنما اللّٰہ بخش یوسفی کے بزرگ بیٹے کے گھر ڈکیتی کرنے میں ملوث ایک زخمی ملزم سمیت 5 ملزمان کو گرفتار کر لیا، گرفتار ملزمان میں ایک خاتون ملزمہ بھی شامل ہے۔ تھانہ گذری کی حدود ڈیفنس فیز فور فورتھ کمرشل اسٹریٹ مکان نمبر 70میں 10دسمبر کو مسلح ڈاکوؤں نے دوران ڈکیتی 82 سالہ طارق یوسفی اور ان کی معذور اہلیہ کو شدید تشدد کا نشانہ بنایا تھا اور عمر رسیدہ میاں بیوی کو ہاتھ باندھ کر منہ پر کپڑا ڈال کر کمروں میں بند کر کے 15تولا سونا، 30ہزار درہم ،90ہزار پاکستانی روپے، کپڑے ، جوتے اور موبائل فون لوٹ کر فرار ہو گئے تھے۔ڈی آئی جی ساؤتھ سید اسد رضا کے مطابق گزری پولیس نے واقعہ میں ملوث ایک زخمی ملزم ارشد منور مسیح کو دو روز قبل پولیس مقابلے میں گرفتار کیا اور اس کی نشاندہی پر خاتون سمیت اس کے مزید چار ساتھیوں کو گرفتار کر لیا ہے۔گرفتار دیگر ملزمان میں شریفہ بیگم مسیح، شفیع بنگالی، شہریار بنگالی اور گلزار مسیح شامل ہیں۔
