وینزویلا کا انتظام، تیل کے ذخائر ہم سنبھالیں گے، ٹرمپ، فوجی بھی اتار سکتے ہیں، امریکی صدر، کیوبا اور کولمبیا کو بھی دھمکی

کراچی (نیوز ڈیسک) امریکا نے وینزویلا پر حملہ کردیا، صدرنکولس مادورو اور ان کی اہلیہ کوپکڑ کر امریکی جہاز پر منتقل کردیا، امریکی ڈیلٹا فورس نے رات2بجے کارروائی کی،سب سے بڑے فوجی مرکز پر میزائل داغے،دھماکے، شہری آبادی پر بھی حملے، دارالحکومت کراکس میں کئی مقامات پر آگ بھڑک اٹھی،کارروائی کے بعد امریکا نے غرب الہند کی فضائی حدود بندکردی، امریکی صدر ڈونلڈ ٹرمپ کا کہنا ہے کہ دونوں پر فرد جرم عائد کردی گئی ہے، دونوں کو نیویارک منتقل کیا جارہا ہے، مادورو کو قلعے سے پکڑا ،صدر ٹرمپ نے صدر نکولس مادورو کے اغوا کے بعد فلوریڈا میں وزیر خارجہ مارکوروبیو اور جنرل کین کے ہمراہ مشترکہ پریس کرتے ہوئے کہا کہ وینزویلا میں مناسب انتقال اقتدار تک وینزویلا کا انتظام اور تیل کے ذخائر ہم سنبھالیں گے، وینزویلا میں فوجی بھی اتار سکتے ہیں ،امریکی صدر اور دیگر عہدیداروں نے کیوبا اور کولمبیا کو مادورو طرز کے انجام کی دھمکی بھی دی ،چین کے خدشات سے متعلق سوال پرصدر ٹرمپ نے جواب دیا کہ میرے صدرشی سے اچھے تعلقات ہیں،انہیں تیل ملتا رہے گا،امریکی صدر نے دعویٰ کیا کہ وینزویلا کی نائب صدر روڈریگز نے صدارتی حلف اٹھالیا ہے، تاہم خاتون نائب صدر نے ٹرمپ کو جواب دیتے ہوئے کہا کہ مادورو ہی ملک کے واحد صدر ہیں ، انہیں اغوا کیا گیا ، کسی ملک کی کالونی نہیں بنیں گے، وینزویلا کے وزیر دفاع و لادیمیر پادرینو لوپیز نے کہا ہے کہ وینزویلا کو اپنی تاریخ کی ’اب تک کی بدترین جارحیت‘ کا سامنا ہے،امریکا نے شہری اور فوجی تنصیبات کو نشانہ بنایا ، ہار نہیں مانیں گے ، امریکا ہمیں زیر نہیں کر سکے گا، وینزویلا کی نائب صدر ڈیلسی روڈریگز کا کہنا ہے کہ صدر مادورو اور خاتون اول کی زندگی کا ثبوت دیا جائے، وینزویلا نے امریکی حملے کے بعد سلامتی کونسل کا اجلاس طلب کرلیا ہے ۔ تفصیلات کے مطابق امریکا نے وینزویلا پر حملہ کردیا ، وینزویلا کے صدر نکولس مادورو اور ان کی اہلیہ کو امریکی فوج کے خصوصی یونٹ ’ڈیلٹا فورس‘ نے اپنی حراست میں لے لیا ہے۔صدر ٹرمپ نے فاکس نیوز کو بتایا کہ انہوں نے وینزویلا کے صدر نکولس مادورو اور ان کی اہلیہ کو گرفتار کرنے کی کارروائی، جو رات بھر جاری رہی، کو ’بالکل ایسے دیکھا جیسے میں کوئی ٹیلی ویژن شو دیکھ رہا ہوں۔‘انہوں نے کہا کہ ’اگر آپ نے (امریکی کارروائی کی) رفتار اور شدت دیکھی ہوتی، تو یہ ایک حیرت انگیز منظر تھا۔‘ٹرمپ نے اپنی ٹیم کی تعریف کرتے ہوئے کہا کہ انہوں نے ’ناقابلِ یقین کام‘ کیا ہے۔ان کا مزید کہنا تھا کہ ’دنیا میں کوئی اور ملک ایسا کارنامہ انجام نہیں دے سکتا۔‘صدر نکولس مادورو کے اغوا کے بعد امریکی صدر ڈونلڈ ٹرمپ نے فلوریڈا میں پریس کانفرنس کرتے ہوئے واضح کیا کہ اگر ضرورت پڑی تو دوسرا حملہ کرنے سے گریز نہیں کیاجائیگا، امریکی صدر ڈونلڈ ٹرمپ نے ہفتے کو کہا کہ ان کے کولمبین ہم منصب گستاوو پیٹرو ’جن کے اسرائیل مخالف سخت موقف کے باعث حالیہ مہینوں میں ٹرمپ سے اختلافات رہے ‘کو دھمکاتے ہوئے کہا کہ وینزویلا کے صدر مادورو کے خلاف امریکی فوجی کارروائی کے بعد “سنبھل کر رہنا چاہیے۔ان کے الفاظ تھے کہ"وہ کوکین بنا رہا ہے اور وہ اسے امریکا بھیج رہے ہیں، اسے چاہیے کہ وہ اپنے آپ سنبھال کررکھے۔" ٹرمپ نے وینزویلا کے دیگر سیاسی و عسکری رہنماؤں کو بھی خبردار کیا کہ"جو کچھ مادورو کے ساتھ ہوا ہے، وہ ان کے ساتھ بھی ہو سکتا ہے۔دوران پریس کانفرنس کیوبا کا تذکرہ بھی ہوا اور امریکی عہدیداروں نے بتایا کہ صدرمادوروکی حفاظت پر مامور محافظ کیوبن تھے اور کیو با میں موجود حکومت کےلیے یہ بات باعث تشویش ہونی چاہیے۔ "انہوں نے پریس کانفرنس میں کہاہم اس ملک کو اس وقت تک چلائیں گے جب تک ہم ایک محفوظ، مناسب اور منصفانہ سیاسی انتقال نہیں کر لیتے۔ انہوں نے اپنے پیچھے کھڑے ہوئے سرکردہ امریکی عہدیداروں نے وزیرِ خارجہ مارکو روبیو اور وزیرِ جنگ پیٹ ہیگستھ کی طرف اشارہ کرتے ہوئے کہا کہ جو لوگ میرے پیچھے کھڑے ہیں، وہی اسے کچھ عرصے کے لیے چلائیں گے۔ امریکی صدر ڈونلڈ ٹرمپ نے ہفتے کے روز کہا کہ نوبل امن انعام یافتہ اپوزیشن لیڈر ماریا کورینا ماچادو کو وینزویلا کی عبوری سربراہ بنانا مشکل ہوگا۔ ٹرمپ نے پریس کانفرنس میں کہا"میرے خیال میں اس کے لیے ملک کی سربراہ بننا بہت مشکل ہوگا۔ وہ بہت عمدہ خاتون ہیں تاہم انہیں ملک کے اندر وہ حمایت یا عزت حاصل نہیں ہے۔ایک سوال کے جواب میں انہوں نے کہا کہ ”ہم دنیا کی سب سے بڑی امریکی تیل کمپنیوں کو وہاں بھیجیں گے، جو اربوں ڈالر خرچ کر کے تباہ حال تیل کے ڈھانچے کی مرمت کریں گی اور اس کے ذریعے ملک کے لیے آمدن پیدا کریں گی۔ہم اپنی بہت بڑی امریکی تیل کمپنیوں جو دنیا کی سب سے بڑی کمپنیاں ہیں کو وہاں بھیجیں گے۔ وہ اربوں ڈالر خرچ کریں گی، تباہ شدہ تیل کے ڈھانچے کو ٹھیک کریں گی، اور ملک کے لیے پیسہ کمانا شروع کریں گی۔"وینزویلا کے تیل پر عائد تمام پابندیاں بدستور برقرار رہیں گی۔"امریکی جنرل ڈین کین نے ہفتے کو صحافیوں کو بتایا کہ وینزویلا کے صدر نکولس مادورو کو کاراکاس میں رات کے وقت کی جانے والی کارروائی کے دوران نکالنے کا فوجی آپریشن کئی ماہ کی منصوبہ بندی اور مشقوں کا نتیجہ تھا، اور اس میں ڈیڑھ سو سے زائد امریکی طیارے استعمال کیے گئے۔ان کا کہنا تھا کہ"انضمام (Integration) کا لفظ اس مشن کی پیچیدگی بیان نہیں کرتا یہ ایک انتہائی درستگی کے ساتھ انجام دی جانے والی کارروائی تھی، جس میں پورے مغربی نصف کرہ سے 150 سے زیادہ طیارے اڑے۔"صدر ڈونلڈ ٹرمپ نے ہفتے کو کہا کہ امریکی فوج نے وینزویلا کے دارالحکومت کاراکاس میں بجلی بند کروائی تاکہ مادورو کو گرفتار کرنے کی حیران کن کارروائی کو انجام دیا جا سکے۔انہوں نے پریس کانفرنس میں کہا"اندھیرا تھا۔ کاراکاس کی بیشتر بتیاں بجھی ہوئی تھیں ایک خاص مہارت (ہارڈویئر/ٹیکنیکل صلاحیت) کی وجہ سے جو ہمارے پاس ہے۔"اس واقعہ کو امریکی صدر نے امریکیوں کےلیے افتخار کا موقع قرار دیتے ہوئے کہا کہ ”ہم نے اس سے پہلے اس طرح کی کوئی چیز نہیں دیکھی۔“قبل ازیں امریکی صدر ڈونلڈ ٹرمپ نے فاکس نیوز کو مزید بتایا کہ وینزویلا کے صدر مادورو اور ان کی اہلیہ کو امریکی فورسز کی جانب سے گرفتار کئے جانے کے بعد اب نیویارک منتقل کیا جا رہا ہے۔امریکی صدر نے کہا اُن دونوں پر نیویارک میں فردِ جرم عائد کی جا چکی ہے اور انہیں ہیلی کاپٹر اور جہاز کے ذریعے ریاست (نیویارک) میں لے جایا جائے گا۔ٹرمپ نے مزید کہا کہ ’انہوںنے بہت سے لوگوں کو قتل کیا ہے، جن میں امریکی شہری بھی شامل ہیں، حتیٰ کہ اپنے ہی ملک کے لوگوں کو بھی۔‘