• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

دنیا بھر میں 43 واں سالانہ عالمی یوم خطیب ِ اعظم عقیدت و محبت سے منایا گیا

آج کا اخبار
اہم خبریں
10 جنوری ، 2026
کراچی ( جنگ نیوز) مولانا محمد شفیع اوکاڑوی کو ایصالِ ثواب کے لئے ماہ رجب کے تیسرے جمعہ کو مولانا اوکاڑوی اکادمی (العالمی) اور گل زار حبیب ٹرسٹ کی اپیل پر دنیا بھر میں اہل سنت کی مساجد و مدارس، مراکز اور خانقاہوں میں 43واں سالانہ عالمی یوم خطیب اعظم عقیدت و محبت سے منایا گیا۔ علما و مشائخ اور ائمہ و خطبا نے اپنے خطبات میں مولانا محمد شفیع اوکاڑوی کی حیات و خدمات، ذات و صفات اور دین و ملت اور ملک و قوم کے لئے ان کے مثالی کارہائے نمایاں اور انہیں والہانہ خراج محبت و عقیدت پیش کیا اور انہیں ایصال ثواب کے لئے اجتماعی فاتحہ خوانی کی۔ بنگلہ دیش، بھارت، آسٹریلیا، نیوزی لینڈ، ہانگ کانگ، سری لنکا، جنوبی افریقا، ملاوی، سوازی لینڈ، بوٹسوانا، برطانیا، جرمنی، آسٹریا، ہالینڈ، سوِئٹزر لینڈ، اسپین سمیت 49ملکوں میں انفرادی اور اجتماعی طور پر سالانہ عالمی یوم خطیب اعظم منایا گیا۔ جموں کشمیر اور اجمیر شریف میں بھی خصوصی اہتمام سے یوم خطیب اعظم منایا گیا۔ عقیدت مندوں نے مکہ مکرمہ، مدینہ منورہ، کربلا مقدسہ اور بغداد شریف میں فاتحہ خوانی کا اہتمام کیا۔ بھارت میں 2,000 سے زائد مقامات پر یوم خطیب اعظم کے اجتماع ہوئے۔ سالانہ عالمی یوم خطیب اعظم کا مرکزی اجتماع جامع مسجد گل زار حبیب، گلستان اوکاڑوی(سولجر بازار) کراچی میں ہوا۔ جہاں ملک اور بیرون ملک سے علما و مشائخ اور عقیدت مند حضرات و خواتین کی بڑی تعداد نے شرکت کی۔ اجتماع میں بیرسٹر علامہ پیر سید وسیم الحسن نقوی حافظ آبادی، مولانا سید عظمت علی شاہ ہمدانی، 135 سالہ سید نذر حسین شاہ صاحب، علامہ زبیر ہزاروی صدیقی سمیت متعدد معززین نے شرکت کی۔ قراردادیں پیش کرتے ہوئے مطالبہ کیا گیا کہ قرآن و سنّت کو مانتے ہوے ملک کے اسلامی تشخص کا تحفظ کیا جاے، غیر اسلامی قوانین کو فو الفور ختم کیا جاے اور ہر سطح پر فحاشی اور بے راہ روی کا قلع قمع کیا جائے ۔ اجتماع میں ایصال ثواب کرتے ہوئے ایک کروڑ 78 لاکھ مرتبہ ختم قرآن اور 247 اَرب 88 کروڑ مرتبہ درود شریف کے وِرد اور کروڑوں مرتبہ پڑھے گئے اور اد وو ظائف کا ہدیہ پیش کیا گیا۔ علامہ کوکب نورانی اوکاڑوی نے اجتماعی دعا کی اور اعلان کیا کہ 44 واں سالانہ عرس 31 دسمبر 2026ء اور یکم جنوری 2027ء کو منعقد ہوگا۔
اہم خبریں سے مزید