• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

خیبرپختونخوا کے سیاحتی مقام ایوبیہ میں چیئر لفٹ مرمت کے نام پر 5 سال سے بند

میرا شہر
پشاور
15 جنوری ، 2026
پشاور(سٹاف رپورٹر)خیبرپختونخوا کے ضلع ایبٹ آباد میں واقع معروف سیاحتی مقام ایوبیہ میں چیئرلفٹ گزشتہ پانچ سال سے مرمت کے نام پر بند ہونے کا معاملہ خیبرپختونخوا اسمبلی پہنچ گیا ہے۔ اس صورتحال کے باعث نہ صرف سیاحت متاثر ہو رہی ہے بلکہ صوبائی حکومت کو بھی مالی نقصان کا سامنا ہے۔خیبرپختونخوا اسمبلی کے اجلاس کے دوران جمعیت علمائے اسلام کی خاتون رکن ایمن جلیل نے عوامی مسئلے پر توجہ دلاؤ نوٹس جمع کروایا۔ توجہ دلاؤ نوٹس میں بتایا گیا کہ ایوبیہ میں چیئرلفٹ گزشتہ پانچ سال سے غیر فعال ہے، جسے مرمت کا جواز بنا کر بند رکھا گیا ہے۔نوٹس میں کہا گیا کہ اگرچہ بڑی تعداد میں سیاح ایوبیہ کا رخ کر رہے ہیں تاہم چیئرلفٹ بند ہونے کے باعث سیاحوں کی دلچسپی اور آمد میں نمایاں کمی واقع ہو رہی ہے جس سے مقامی معیشت اور روزگار پر منفی اثرات مرتب ہو رہے ہیں۔ایمن جلیل نے اپنے نوٹس میں اس امر کی نشاندہی بھی کی کہ چیئرلفٹ کی طویل بندش کے باعث صوبائی حکومت کو ٹکٹوں اور سیاحتی سرگرمیوں سے حاصل ہونے والا ریونیو بھی بری طرح متاثر ہو رہا ہے، جو حکومتی غفلت کا واضح ثبوت ہے۔توجہ دلاؤ نوٹس میں صوبائی حکومت سے مطالبہ کیا گیا ہے کہ مرمت کے نام پر پانچ سال سے بند چیئرلفٹ کو فوری طور پر فعال کیا جائے تاکہ سیاحوں کو سہولیات فراہم کی جا سکیں اور صوبے کو سیاحت کے شعبے سے دوبارہ خاطر خواہ آمدن حاصل ہو۔واضح رہے کہ ایوبیہ خیبرپختونخوا کے اہم سیاحتی مقامات میں شمار ہوتا ہے، جہاں ہر سال ملک بھر سے بڑی تعداد میں سیاح تفریح کیلئے آتے ہیں، تاہم بنیادی سہولیات کی عدم دستیابی سیاحت کے فروغ میں بڑی رکاوٹ بن رہی ہے۔
پشاور سے مزید