فرمان الہی
نماز کے اوقات
اسلام آباد (عرفان صدیقی) پاکستان کرکٹ کے مایہ ناز آل راؤنڈر شاہد خان آفریدی نے کہا ہے کہ پا کستان کو تیزی سے ترقی کرتا ہوا ملک دیکھنا چاہتا ہوں ، مگر اس کیلئے سب سے بنیادی عنصر تسلسل ہے۔ چند ذاتی وجہ کے سبب کراچی چھوڑ کر مستقل طور پر اسلام آباد منتقل ہونے کی تصدیق کر دی ہے۔ان کا کہنا ہےپاکستان اور پاکستان کرکٹ نے دنیا بھر میں عزت، مقام اور شناخت دی۔ خواہش ہے کہ اب پاکستان کرکٹ اور ملک کو کچھ واپس لوٹا سکوں۔فی الحال سیاست میں نہیں آرہا، حکومت کو اپنی پانچ سالہ آئینی مدت مکمل کرنی چاہیے، چیف جسٹس ، آرمی چیف سمیت تمام اہم آئینی عہدوں پر فائز شخصیات کو اپنی آئینی مدت پوری کرنے دی جانی چاہیے۔ انہوں نے انکشاف کیا کہ ماضی میں اہم حکومتی عہدوں کی پیشکش کی گئی، مگر ہمیشہ ایسی ذمہ داریوں سے گریز کیا۔ محض رسمی عہدے میرے لیے کوئی کشش نہیں رکھتے ۔اسلام آباد میں اپنی نئی رہائش گاہ پر روزنامہ جنگ سے خصوصی گفتگو میںانہوں نے کہا کہ پالیسیوں میں تسلسل، جمہوری عمل میں تسلسل اور ریاستی اداروں میں آئینی مدت کی تکمیل ہی ترقی کی مضبوط بنیاد بنتی ہے۔ ریاستی ادارے اپنی مدت مکمل کریں گے تو پالیسیاں برقرار رہیں گی اور ترقی کے ثمرات جلد عام آدمی تک پہنچیں گے۔
