• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

وفاقی رقوم کی عدم ادائیگی، وزیراعلیٰ KP کا وزیراعظم کو خط

آج کا اخبار
اہم خبریں
27 جنوری ، 2026
پشاور(صباح نیوز)وزیراعلیٰ خیبر پختونخوا محمد سہیل آفریدی نے وفاقی حکومت کی جانب سے آئینی طور پر لازم وفاقی رقوم کی عدم ادائیگی پر وزیرِاعظم پاکستان کو باضابطہ خط ارسال کر دیا ہے۔ خط میں وزیراعلیٰ نے واضح کیا ہے کہ وفاقی منتقلیوں میں مسلسل تاخیر صوبے کو شدید مالی بحران سے دوچار کر رہی ہے جسکے نتیجے میں صوبائی گورننس، بجٹ عمل درآمد اور عوامی خدمات کی فراہمی بری طرح متاثر ہو رہی ہے۔ انہوں نے بتایا کہ وفاقی قابل تقسیم پول سے 658 ارب روپے کے مقابلے میں اب تک صرف 604 ارب روپے موصول ہوئے ہیں جسکے باعث 54 ارب روپے کی واضح شارٹ فال پیدا ہوئی ہے، جس نے کیش مینجمنٹ اور ترقیاتی و سماجی منصوبوں کی بروقت تکمیل کو شدید متاثر کیا ہے۔محمد سہیل آفریدی نے اس امر پر زور دیا کہ خیبر پختونخوا دہشت گردی کے خلاف جنگ میں فرنٹ لائن صوبہ ہے اور قومی سطح پر بھاری اخراجات برداشت کر رہا ہے۔ انسداد دہشت گردی، سیلاب سے بحالی، عارضی طور پر بے گھر افراد کی دیکھ بھال اور امن و امان کے قیام جیسے امور پر آنے والا مالی بوجھ غیر منصفانہ طور پر صوبے پر ڈالا جا رہا ہے، جو درحقیقت قومی ذمہ داریاں ہیں۔ خط میں وزیراعلیٰ نے ضم شدہ اضلاع کی صورتحال پر بھی شدید تشویش کا اظہار کرتے ہوئے بتایا کہ ان اضلاع کے لیے صوبائی سطح پر 292 ارب روپے مختص کیے گئے تھے جبکہ وفاق کی جانب سے اب تک صرف 56 ارب روپے جاری کیے گئے ہیں۔
اہم خبریں سے مزید