فرمان الہی
نماز کے اوقات
کراچی (اسٹاف رپورٹر) پاکستان کرکٹ بورڈ کا کہنا ہے کہ آکشن سے پہلے ہر فرنچائز کل 4 کھلاڑی اور فی کیٹیگری ایک کھلاڑی برقرار رکھ سکے گی۔ پلیئرز آکشن 11 فروری کو ہوگا، غیر ملکی کھلاڑیوں کی رجسٹریشن کی تاریخ 3 فروری تک بڑھا دی گئی ہے۔ ادھر بورڈ نے پاکستان سپر لیگ کے گیارہویں ایڈیشن میں کھلاڑیوں کی کیٹیگریز کا اعلان کردیا ۔89 مقامی کھلاڑی 5 مختلف کیٹیگریز میں تقسیم کئے گئے ہیں۔ پلاٹینم کیٹیگری میں 16 کھلاڑی شامل ہیں۔ سلمان علی آغا، حسن علی، محمد نواز اور ابرار احمد کی ڈائمنڈ سے پلاٹینم کیٹیگری میں ترقی دے دی گئی ہے۔ صاحبزادہ فرحان گولڈ سے پلاٹینم کیٹیگری میں پہنچ گئے ہیں۔ بابر اعظم، شاہین شاہ آفریدی، محمد رضوان، فخر زمان، صائم ایوب، نسیم شاہ، حارث رؤف اور شاداب خان پلاٹینم کیٹیگری میں برقرار ہیں۔11 کھلاڑی ڈائمنڈ کیٹیگری میں شامل ہیں۔ محمد وسیم جونیئر، سفیان مقیم اور سلمان مرزا گولڈ سے ڈائمنڈ میں ترقی پا گئے ہیں۔ گولڈ کیٹیگری میں 32 کھلاڑی شامل ہیں۔ سلور اور ایمرجنگ کیٹیگری میں 30 کھلاڑی ہوں گے۔
