• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

قلعہ کہنہ قاسم باغ کی بحالی کیلئے 50کروڑ روپے کے اضافی فنڈز جاری

میرا شہر
ملتان
10 مارچ ، 2026
ملتان (سٹاف رپورٹر)کمشنر ملتان ڈویژن عامر کریم خاں نے والڈ سٹی اتھارٹی کے زیر نگرانی قلعہ کہنہ قاسم باغ میں جاری اپ گریڈیشن اور بحالی کے منصوبے کا تفصیلی جائزہ لیا۔ دورے کے دوران منصوبے کی پیشرفت، تعمیراتی معیار اور جاری ترقیاتی کاموں کا معائنہ کیا گیا۔کمشنر کی درخواست پر وزیر اعلیٰ پنجاب کی جانب سے قلعہ کہنہ قاسم باغ کی بحالی کیلئے 50 کروڑ روپے کے اضافی فنڈز جاری کر دیے گئے ہیں۔کمشنر ملتان نے ہدایت کی کہ منصوبے پر کام کی رفتار مزید بڑھائی جائے اور زیادہ سے زیادہ ترقیاتی کام جون تک مکمل کیے جائیں ۔انہوں نے زور دیا کہ قلعہ کہنہ قاسم باغ کی بحالی اور اپ گریڈیشن کے دوران تاریخی ورثے کی اصل حیثیت اور قدیم طرز تعمیر کو برقرار رکھا جائے تاکہ اس مقام کی تاریخی اہمیت محفوظ رہ سکے۔کمشنر نے تعمیراتی معیار، ڈیزائن اور منصوبے کی مجموعی پیشرفت کا جائزہ لیتے ہوئے متعلقہ حکام کو ہدایت کی کہ کام مقررہ مدت کے اندر مکمل کیا جائے اور معیار پر کسی قسم کا سمجھوتہ نہ کیا جائے۔انہوں نے کہا کہ قلعہ کہنہ قاسم اور اس کے اطراف کی بحالی سے ملتان کا تاریخی تشخص مزید اجاگر ہوگا اور سیاحت کو بھی فروغ ملے گا۔کمشنر نے قلعہ کہنہ قاسم باغ کی لائبریری میں جدید طرز کا کیفے قائم کرنے کے منصوبے پر بھی جلد کام شروع کرنے کی ہدایت کی۔
ملتان سے مزید