فرمان الہی
نماز کے اوقات
کراچی (رفیق مانگٹ) بیشتر ممالک میں بھنگ غیر قانونی، غیر طبی استعمال پر قید و جرمانے برقرار، امریکا کی 23ریاستوں میں استعمال قانونی مگر وفاقی سطح پر فروخت اب بھی جرم ہے۔ پاکستان، بھارت، برطانیہ میں بھی قابل سزا جرم، فرانس، اٹلی، پولینڈ میں تفریحی استعمال غیر قانونی ہے۔ دنیا بھر میں بھنگ (Cannabis/Marijuana) کے قوانین انتہائی متضاد اور تیزی سے تبدیل ہونے والے ہیں۔ زیادہ تر ممالک اب بھی اسے کنٹرولڈ یا غیر قانونی مادہ قرار دیتے ہیں، جبکہ چند ممالک نے محدود یا مکمل قانونی اجازت دے دی ہے۔ تاہم عالمی سطح پر بنیادی اصول اب بھی یہی ہے کہ غیر طبی استعمال اکثر جرم تصور کیا جاتا ہے اور اس پر قید و جرمانہ ہو سکتا ہے۔ امریکہ میں بھنگ کی قانونی حیثیت ریاستوں کے درمیان بہت مختلف ہے۔ 23 ریاستوں میں تفریحی استعمال قانونی ہے، 16 ریاستوں میں صرف میڈیکل استعمال جائز ہے، جبکہ 10 ریاستوں میں یہ مکمل طور پر غیر قانونی ہے۔ ان ریاستوں میں سزائیں بھی مختلف ہیں، جیسے ٹیکساس میں 180 دن قید اور 2000 ڈالرجرمانہ ہو سکتا ہے جبکہ ٹینیسی میں پہلی بار گرفتاری پر ایک سال تک قید ہو سکتی ہے۔وفاقی قانون کے تحت، بھنگ کا قبضہ ایک جرم ہے جس پر جرمانہ اور قید کی سزا ہو سکتی ہے.اسے فروخت کرنے یا کاشت کرنے پر 5 سال سے عمر قید تک کی سزا ہے۔ اگرچہ 23 اپریل 2026 کو ٹرمپ انتظامیہ نے میڈیکل ماریجوانا کو شیڈول III میں منتقل کر دیا، لیکن اس سے وفاقی قانون میں تفریحی استعمال پر پابندی ختم نہیں ہوئی ہے۔پاکستان میں بھنگ سے متعلق صورتحال دوہری ہے۔ کنٹرول آف نارکوٹک سبسٹنسز ایکٹ (CNSA) 1997 کے تحت بھنگ کا قبضہ، کاشت اور اسمگلنگ جرم ہے۔ 100 گرام سے کم بھنگ رکھنے پر 2 سال قید اور جرمانہ، جبکہ 100 گرام سے 1 کلوگرام تک رکھنے پر 7 سال قید اور جرمانہ ہو سکتا ہےتاہم، سخت منشیات (heroin/cocaine) کے مقابلے میں ذاتی استعمال کے لیے بھنگ رکھنے والوں کو اکثر نظرانداز کر دیا جاتا ہے۔ جنوری 2026 میں پاکستان نے قومی بھنگ کنٹرول اینڈ ریگولیٹری پالیسی منظور کی۔ اس کا مقصد نشے کے غلط استعمال کو روکنا ہے، اور یہ میڈیکل اور صنعتی استعمال کے لیے ریگولیٹڈ کاشت کی راہ ہموار کرتی ہے۔ تاہم، اس پالیسی کا تعلق فی الحال تفریحی استعمال کو قانونی شکل دینے سے نہیں ہے۔ بھارت میں منشیات کے قوانین NDPS ایکٹ، 1985بہت سخت ہیں۔ سزاؤں کا انحصار منشیات کی مقدار پر ہے.بغیر لائسنس کے بھنگ اگانے پر 10 سال تک سخت قید اور 1 لاکھ روپے تک جرمانہ ہو سکتا ہے.چھوٹی مقدار پر6 ماہ تک قید یا دس ہزار روپے جرمانہ یا دونوں۔تجارتی مقدار پر 10 سے 20 سال سخت قید اور 1 سے 2 لاکھ روپے جرمانہ۔ دوبارہ جرم پر سزا ڈیڑھ گنا بڑھا دی جاتی ہے اور بعض صورتوں میں سزائے موت بھی ہو سکتی ہے۔ یورپ میں جرمنی سے چیک ریپبلک تک بھنگ کے قوانین میں بہت اختلاف ہے۔جرمنی میں اپریل 2024 سے 18 سال یا اس سے زیادہ عمر کے بالغ افراد 25 گرام تک عوامی مقامات پر اور 50 گرام تک گھر پر رکھ سکتے ہیں۔ 18 سال سے زیادہ عمر کے افراد گھر پر زیادہ سے زیادہ 3 پودے اگانے کے بھی مجاز ہیں۔ مالٹا اور لکسمبرگ میں گھر پر کاشت کی اجازت ہے۔ مالٹا میں عوامی مقامات پر 7 گرام تک رکھنا قانونی ہے اور لکسمبرگ میں 4 پودے گھر پر اگائے جا سکتے ہیں۔چیک ریپبلک میں یکم جنوری 2026 سے 21 سال سے زیادہ عمر کے افراد ذاتی استعمال کے لیے زیادہ سے زیادہ 3 پودے گھر پر اگا سکتے ہیں۔
