فرمان الہی
نماز کے اوقات
برطانیہ میں رواں سال کی پہلی شدید گرمی کی لہر کے پیشِ نظر ہیٹ ہیلتھ الرٹ جاری کر دیا گیا ہے جہاں مختلف علاقوں میں درجۂ حرارت 31 سینٹی گریڈ تک پہنچنے کی توقع ظاہر کی جا رہی ہے۔
یو کے ہیلتھ سیکیورٹی ایجنسی نے آج سے 6 روزہ ہیٹ ہیلتھ الرٹ نافذ کرتے ہوئے خبردار کیا ہے کہ غیر معمولی ٹھنڈ کے بعد اب موسم میں نمایاں گرمی دیکھی جائے گی، جنوبی، مشرقی اور وسطی انگلینڈ میں بھی شدید گرمی کی لہر کا امکان ہے۔
ادارے نے کمزور صحت والے اور بزرگ افراد کو احتیاطی تدابیر اختیار کرنے کی ہدایت کرتے ہوئے کہا ہے کہ وہ گرمی کے اثرات سے بچنے کے لیے ہر ممکن اقدامات یقینی بنائیں۔
محکمۂ موسمیات کے مطابق جمعے سے منگل تک درجۂ حرارت کم از کم 28 سینٹی گریڈ رہنے کی توقع ہے جبکہ بعض علاقوں میں یہ 31 سینٹی گریڈ تک بھی جا سکتا ہے۔
بدھ کے روز موسم میں کسی حد تک کمی آنے کا امکان ظاہر کیا گیا ہے۔
لندن، ہوم کاؤنٹیز، ویسٹ مڈلینڈز، اسکاٹ لینڈ، ویلز اور شمالی آئر لینڈ میں درجۂ حرارت 25 سے 28 سینٹی گریڈ کے درمیان رہنے کی پیشگوئی کی گئی ہے۔
ماہرین کے مطابق 2050ء تک برطانیہ میں شدید گرمی کے خطرات میں 300 فیصد تک اضافہ ہو سکتا ہے جس کے باعث عوام کو مستقبل میں زیادہ گرم موسم کا سامنا کرنے کی عادت اپنانا ہو گی۔
