فرمان الہی
نماز کے اوقات
برطانیہ میں جون کے مہینے کی ریکارڈ توڑ گرمی کے بعد محکمۂ موسمیات نے درجۂ حرارت میں کمی اور گرج چمک کے ساتھ بارشوں کی پیش گوئی کر دی ہے۔
برطانیہ کے محکمۂ موسمیات (میٹ آفس) کے مطابق جمعے کو جون کا گرم ترین دن ریکارڈ کیا گیا، جب سفوک کے علاقے سینٹن ڈاؤنہم میں درجۂ حرارت عارضی طور پر 37.3 ڈگری سینٹی گریڈ تک پہنچ گیا۔
اس سے ایک روز قبل سومرسیٹ کے علاقے میری فیلڈ میں درجۂ حرارت 36.7 ڈگری سینٹی گریڈ ریکارڈ کیا گیا تھا۔
ماہرین کے مطابق یہ درجۂ حرارت 1976ء میں قائم ہونے والا جون کے مہینے کا پرانا ریکارڈ 1 ڈگری سینٹی گریڈ سے زائد فرق سے توڑ چکا ہے، جو ایک غیر معمولی پیش رفت ہے کیونکہ ماضی میں ایسے ریکارڈ معمولی فرق سے ٹوٹتے تھے۔
سائنسدانوں کا کہنا ہے کہ انسانی سرگرمیوں کے باعث ہونے والی موسمیاتی تبدیلی شدید گرمی کی لہروں کو مزید طاقتور اور زیادہ بار آنے والا بنا رہی ہے، جبکہ 50 برس قبل اس نوعیت کی گرمی کی لہر کا آنا تقریباً ناممکن سمجھا جاتا تھا۔
میٹ آفس کے مطابق مغربی ہواؤں کے اثرات بڑھنے کے باعث ملک کے مختلف علاقوں میں گرج چمک کے ساتھ بارش اور طوفان کا امکان ہے، درجۂ حرارت میں کمی کا آغاز مغربی علاقوں سے ہو گا اور ہفتہ وار تعطیلات کے دوران یہ ٹھنڈا موسم بتدریج مشرقی علاقوں تک بھی پھیل جائے گا۔
