اسلام آباد ( کامرس رپورٹر )رواں برس فروری میں سگریٹ پر ایکسائز ڈیوٹی میں اضافے کے بعد مارکیٹ میں غیر قانونی سگریٹ کا شیئر 48 فیصد تک پہنچ گیا۔جبکہ دو ارب سے زائد سگریٹ پیکٹس پر ٹیکس چوری ہو رہی ہے۔ اس بات کا انکشاف غیر قانونی سگریٹس کے حوالے سے بین الاقوامی ادارے اپساس کی رپورٹ میں سامنے آیا ہے۔ رپورٹ کے مطابق سگریٹ کے شعبے میں ٹیکس چوری کے باعث قومی خزانے کو سالانہ 240 ارب نقصان ہو رہا ہے۔ٹیکس وصولی ٹارگٹ حصول میں کمی کی اہم وجہ غیر قانونی سگریٹ برانڈز کی فروخت میں اضافہ ہے۔ رپورٹ میں مزید انکشاف ہوا ہے کہ اس وقت 83 فیصد سگریٹ بغیر ٹریک اینڈ ٹریس مہر کے فروخت ہو رہے ہیں۔۔ بین الاقوامی مارکیٹ ریسرچ کمپنی ایپساس نے کراچی، لاہور، بہاولپور اور سکھر، راولپنڈی، ملتان، فیصل آباد، گوجرانوالہ، حیدرآباد، پشاور سمیت پاکستان بھر کے ریٹیل آؤٹ لیٹس سروے کے بعد رپورٹ جاری کی، رپورٹ کے مطابق گزشتہ 3 ماہ کے دوران فیڈرل ایکسائز ڈیوٹی کے بعد سے غیر قانونی سگریٹ کے مارکیٹ شیئر میں 11 فیصد سے زیادہ اضافہ ہوا ہے ، غیر قانونی پیداوار اور اسمگلنگ میں 33 فیصد اضافہ ہوا ہے، ۔ ایپساس ریسرچ کے نتائج کے مطابق، قانونی سگریٹ برانڈز کا مجموعی مارکیٹ شیئر 52% ہے، جبکہ سمگل شدہ سگریٹ برانڈز کے پاس 48 فیصد غیر قانونی مارکیٹ شیئر میں سے 10 فیصد ہے اور گزشتہ 3 ماہ کے دوران 51 سے زائد نئے سمگل شدہ برانڈز مارکیٹ میں داخل ہوئے ہیں۔