کراچی(اسٹاف رپورٹر)دفاعی چیمپئن پاکستان کی خواتین کرکٹ ٹیم کو ہانگزو میں ہونے والے19 ویں ایشین گیمز کرکٹ سیمی فائنل میں سری لنکا کے خلاف 6 وکٹوں سے شکست کا سامنا کرنا پڑا۔ پیر کو بنگلہ دیش کی خواتین کرکٹ ٹیم کے خلاف کانسی کے تمغے کے لیے مقابلہ کرنا ہوگا اس سے قبل پاکستان کو سونے کے میڈل کے لئے فیورٹ قرار دیا جارہا تھا۔ جبکہ فائنل بھارت اور سری لنکا کے درمیان کھیلا جائے گا۔اتوار کو سیمی فائنل میں پاکستان ویمنز ٹیم 9 وکٹوں کے نقصان پر75 رنز بناسکی ۔سری لنکا ویمنز نے 16.3 اوورز میں چار وکٹوں کے نقصان پر مطلوبہ اسکور پورا کرلیا۔ پاکستان ویمنز کی طرف سے شوال ذوالفقار ایک چوکے کی مدد سے 16 رنز کے ساتھ ٹاپ اسکورر رہیں۔منیبہ علی 13 اور عمائمہ سہیل 10 رنز کے علاوہ کوئی کھلاڑیڈبل فگرز میں داخل نہ ہوسکیں۔کپتان ندا ڈار9 عالیہ ریاض2 اور سدرہ امین3 رنز بناپائیں۔سری لنکا کی طرف سے 38 سالہ لیفٹ آرم میڈیم پیسر اودیشیکا پرابودھانی نے 21 رنز دے کر3 وکٹیں حاصل کیں۔سری لنکا کی پہلی وکٹ 17 کے مجموعی اسکور پر گری جب کپتان اتاپتو14 رنز بنا کر سعدیہ اقبال کی گیند پرڈیانا بیگ کے ہاتھوں کیچ ہوگئیں۔ انوشکا سنجیووانی کو15 رنز پر ڈیانا بیگ نے آؤٹ کیا۔ آؤٹ ہونے والی تیسری بیٹر وشمی گونارتنے تھیں جو بغیر کوئی رن بنائے ام ہانی کی گیند پر اسٹمپڈ ہوئیں۔ہارشیتھا سمارا وکرما اور نیلاکشی ڈی سلوا کی شراکت میں بننے والے 35 رنز نے سری لنکا کی جیت ممکن بنادی۔ سمارا وکرما 23 رنز بناکر رن آؤٹ ہوئیں ۔ ڈی سلوا ایک چھکے کی مدد سے 18 رنز بناکر ناٹ آؤٹ رہیں ۔