فرمان الہی
نماز کے اوقات
کراچی (ایجنسیاں،ٹی وی رپورٹ) وفاقی وزیر داخلہ شیخ رشید نے کہا ہے کہ نواز شریف کی سیاست نسلہ ٹاور اور پیپلز پارٹی کی سیاست تجوری ہائٹس کی طرح گریگی، سارے گندے اکٹھے ہو کر اسلام آباد آئو ہم ایک ٹھوکر میں مار دینگے، جبکہ فواد چوہدری کا کہنا ہے کہ پاکستان کے سارے کرمنلز نے آج ایک دوسرے کیساتھ ماڈل ٹاؤن میں یکجہتی کااظہارکیا، یہ عمران خان کی دشمنی میں اکٹھے ہوئے ہیں۔
تفصیلات کے مطابق راولپنڈی میں یوم یکجہتی کشمیر کے سلسلے میں ریلی سے خطاب میں شیخ رشید نے پیپلزپارٹی اور (ن) لیگ کی قیادت کو نشانے پر رکھا۔
شیخ رشید نے دونوں جماعتوں کی قیادت پر تنقید ہوے کہا کہ نواز شریف کی سیاست نسلہ ٹاور اور پیپلز پارٹی کی سیاست تجوری ہائٹس کی طرح گریگی ۔ ان کا کہنا تھا کہ فضل الرحمٰن ہمارے ساتھیوں کے پاس مدد لینے کو چلے گئے۔
شیخ رشید نے دونوں جماعتوں کو مخاطب کرتے ہوئے کہا کہ آپکی سیاست کے خاتمے کے دن ہیں۔ وزیر داخلہ نے مزید کہا کہ لال حویلی کا رشتہ سری نگر کے لال چوک سے ثابت کروں گا۔ ان کا کہنا تھا کہ عمران خان پوری کوشش کررہا ہے کہ قوم کو مہنگائی سے نجات ملے۔
دوسری جانب وفاقی وزیر اطلاعات فواد چوہدری نے اپوزیشن جماعتوں مسلم لیگ (ن) اور پیپلز پارٹی کے مابین ہونے والی ملاقات پر کہا کہ یہ وزیر اعظم عمران خان سے دشمنی کی بنیاد پر اکٹھے ہوئے ہیں، یہ بڑی دلچسپ صورتحال ہے کہ شہباز شریف کے پیٹ پھاڑ کر پیسے نکلوانے والے آصف علی زرداری اور بلاول بھٹو اب انکے گھر چلے گئے۔
انہوں نے کہا کہ جب عزت نفس نہ ہوتو وہ ہوتا ہے جو ہم نے لاہور میں دیکھا، پی ڈی ایم پہلے ہی ڈھیلی ڈھالی موومنٹ ہے اور ہر دوسرے روز اپنا رخ بدل لیتی ہے۔
ان کا کہنا تھا لاہور میں اپوزیشن جماعتوں کے رہنماؤں کی ملاقاتیں ہمارے مؤقف کی تائید ہے کہ یہ لوگ کبھی بھی ایک دوسرے سے علیحدہ نہیں ہوئے اور صرف عمران خان سے دشمنی کی بنیاد پر اکٹھے ہوئے ہیں۔
