فرمان الہی
نماز کے اوقات
کراچی(اسٹاف رپورٹر)کراچی میں پی ایس ایل کا میلہ پانچوں میچ جیتنے والی ملتان سلطانز نے لوٹ لیا۔پاکستان سپر لیگ 7کا دوسرا مرحلہ جمعرات سے قذافی اسٹیڈیم لاہور میں ملتان اور پشاور زلمی کے درمیان میچ سے شروع ہورہاہے۔ 27 جنوری سے شروع ہونے والی لیگ کا پہلا مرحلہ 7 فروری تک نیشنل اسٹیڈیم کراچی میں کھیلا گیا۔ اس دوران مجموعی طور پر کھیلے گئے 15سنسنی خیز میچز میں دفاعی چیمپئن ملتان سلطانز کی بالادستی قائم رہی۔محمد رضوان کی قیادت میں میدان میں اترنے والی ٹیم ملتان سلطانز اب تک ٹورنامنٹ میں اپنے تمام پانچوں میچز میں کامیابی حاصل کرنے والی واحد ٹیم ہے۔یوں تو ایونٹ کی تمام ٹیمیں ہی ابھی تک پلے آف میں رسائی کی امیدوار ہےتاہم پہلے مرحلے میں اپنے تمام پانچوں میچز میں شکست کے باعث بابراعظم کی زیرقیادت کراچی کنگز کے لیے ٹورنامنٹ کے باقی ماندہ میچز جیتنا ناگزیر ہوگیا ہے۔ بابراعظم کا کہنا ہےکہ کراچی کنگز کے لیے کراچی میں کھیلا گیا ایچ بی ایل پی ایس ایل7کا پہلا مرحلہ بہت مشکل رہا تاہم انہیں یقین ہے کہ یہ ٹیم ایونٹ میں شاندار کم بیک کرنے کی صلاحیت رکھتی ہے۔ بابراعظم نے کہا وہ پرامید ہیں کہ کراچی کنگز کی ٹیم اتوار کو پشاور زلمی سے شیڈول میچ میں بہترین کارکردگی کا مظاہرہ کرے گی۔ انہوں نے کہا کہ ان کی ٹیم کا ہدف اب صرف دوسرے مرحلے کے تمام میچز جیتنا ہے۔ایڈیشن2016اور2018کی فاتح اسلام آباد یونائیٹڈ شاداب خان کی قیادت میں چھ پوائنٹس کے ساتھ پوائنٹس ٹیبل پر دوسری پوزیشن پر براجمان ہے۔ پانچ میں سے تین میچز جیتنے والی لاہور قلندرز کے پوائنٹس کی تعداد بھی چھ ہے تاہم وہ رن ریٹ کی بنیاد پر پوائنٹس ٹیبل پر تیسری پوزیشن پر موجود ہے۔اب تک دو دو میچز جیتنے والی سرفراز احمد کی کوئٹہ گلیڈی ایٹرز اور وہاب ریاض کی پشاور زلمی کا پوائنٹس ٹیبل پر بالترتیب چوتھا اور پانچواں نمبر ہے۔ اسلام آباد یونائیٹڈ کے کپتان شاداب خان کا کہنا ہے کہ وہ لاہور قلندرز کے خلاف سنسنی خیز میچ میں شکست کے باوجود کراچی میں کھیلے گئے پہلے مرحلے کے اختتام پر اپنی ٹیم کی مجموعی کارکردگی سے بہت خوش ہیں۔ اب ان کی تمام تر توجہ اسلام آباد یونائیٹڈ کی پلے آف میں رسائی کو یقینی بنانا ہے۔پشاور زلمی کے کپتان وہاب ریاض کا کہنا ہے کہ کراچی میں کھیلے گئے لیگ کے پہلے مرحلے میں ٹیم کی کارکردگی توقعات کے مطابق نہیں رہی تاہم تجربہ کار اور باصلاحیت کھلاڑیوں کی موجودگی میں پشاور زلمی کی ٹیم لاہور میں شیڈول لیگ کے دوسرے مرحلے میں بہترین کھیل کا مظاہرہ کرنے کی صلاحیت رکھتی ہے۔ شاہین شاہ آفریدی کا کہنا ہے کہ ان کی ٹیم نے پی ایس ایل7میں شاندار کرکٹ کا مظاہرہ کیا ہے۔ بحیثیت کپتان انہیں خوشی ہے کہ فخر زمان ایک بہترین فارم میں ہیں وہ تسلسل سے عمدہ کارکردگی کا مظاہرہ کر رہے ہیں۔کوئٹہ گلیڈی ایٹرز کے کپتان سرفراز احمد کا کہنا ہے کہ لاہور قلندرز کے خلاف میچ میں کامیابی سے کھلاڑیوں کے اعتماد میں اضافہ ہوا ہے۔ جیسن رائے کی شاندار سنچری سے ٹیم کا مورال بلند ہوا ہے۔
