فرمان الہی
نماز کے اوقات
اسلام آباد، راولپنڈی (نمائندہ جنگ، مانیٹرنگ ڈیسک)وفاقی وزیر داخلہ شیخ رشید احمد نے کہاہے کہ عمران خان کو بجٹ پیش کرنے کے بعد اسمبلیاں تحلیل کرنے کا مشورہ دیا،عدم اعتماد کی ووٹنگ3 یا4اپریل کو ہوگی، دھرنا دینے والوں کو دھرلیں گے۔
فوج بھی طلب کی جاسکتی ہے،مفرور قاتلوں کو ووٹ ڈالنے کیلئے دبئی سے لایاجارہاہے،جام عبدالکریم کو گرفتار کرکےنام ECLمیں ڈالیںگے، عدالتی احکامات پر امن وامان کی صورتحال کو برقرار رکھا جائے گااور کسی کو دھرنے کی اجازت نہیں دی جائے گی،پاکستان تحریک انصاف وزیراعظم عمران خان کی قیادت میں 27مارچ کو تاریخی جلسہ کرے گی۔
دنیا کی نظریں پاکستانی سیاست پر ہیں اور عمران خان کی مقبولیت میں اضافہ ہوا ہے، اپوزیشن والے بوکھلاہٹ اور گھبراہٹ کا شکار ہیں اوروزیراعظم عمران خان عدم اعتماد میں سرخرو ہوں گے۔
ہفتہ کواسلام آباد میں پریس کانفرنس کرتے ہوئے شیخ رشید احمد نے کہا کہ 27مارچ کو ایک بڑی ریلی لال حویلی سے نکلے گی کیونکہ راولپنڈی کے عوام وزیراعظم عمران خان اور وفاداروں کے ساتھ کھڑے ہیں۔
ہمیں اطلاعات موصول ہوئی ہیں کہ اپوزیشن والے بوکھلائے اور گھبرائے ہیں جس کی وجہ سے پی ٹی آئی کی ریلی اور جلسہ میں رکاوٹیں ڈالنے کی کوشش کی جارہی ہے اوراگر پاکستان تحریک انصاف کی ریلی میں رکاوٹیں ڈالنے کی کوشش کی گئی تو سخت ایکشن لیاجائے گا۔
شیخ رشید نے کہا کہ سپریم کورٹ اور ہائی کورٹ کے احکامات پرسختی سے عمل کریں گے جس کے مطابق سرینگر ہائی وےکو رینجرز کے حوالے کردیا گیا ہے تاکہ امن وامان کی صورتحال کوبرقرار رکھا جاسکے، سکیورٹی کے لیے دوہزار رینجرز، دو ہزارایف سی اور دو ہزار دیگر اہلکار تعینات کردیئے گئے ہیں۔
انہوں نے کہا کہ ناظم جوکھیو کے قتل میں نامزد ملزم رکن قومی اسمبلی جام عبدالکریم دبئی سے عدم اعتماد میں ووٹ ڈالنے آرہے ہیں جن کی گرفتاری کے لیے آئی جی سندھ کو احکامات جاری کردیئے ہیں اور جیسے ہی وہ پاکستان پہنچیں گے انہیں گرفتار کرلیا جائے گا اور ان کا نام بھی انٹرپول اور ای سی ایل میں شامل کردیاجائے گا تاکہ جہاں بھی ہو اسے پکڑا جاسکے۔
انہوں نے کہا کہ جے یو آئی کو ایچ نائن گراونڈ میں جلسہ کی اجازت دی گئی ہے لیکن سب کان کھول کر سن لیں کہ کسی کو قانون ہاتھ میں لینے کی اجازت نہیں دی جائے گی، جو بھی قانون ہاتھ میں لے گا قانون اسے ہاتھ میں لے گا۔
وزارت داخلہ کو اختیار ہےکہ وزیراعظم اور کابینہ کی منظوری سےآرٹیکل 245 کےتحت فوج کو طلب کرسکتی ہے، اللہ کرے وہ وقت نہ آئے اور امید ہے نہیں آئے گا۔
