فرمان الہی
نماز کے اوقات
کراچی(اسٹاف رپورٹر) پاکستان کی قومی کر کٹ ٹیم آئندہ 12 ماہ میں مصروف ترین انٹر نیشنل سیزن کھیلے گی۔جمعے کو پی سی بی کی جانب سے جاری شیڈول کے مطابق مئی 2022 سے مئی 2023 تک پانچ مینز اور پانچ ویمنز غیرملکی کرکٹ ٹیمیں پاکستان کا دورہ کریں گی۔اس دوران قومی مینز کرکٹ ٹیم سات ٹیسٹ، 17 ون ڈے اور 25 ٹی 20 انٹرنیشنل میچز کھیلے گی۔ آئی سی سی ورلڈ ٹیسٹ چیمپئن شپ میں شامل یہ 7 ٹیسٹ میچز میں سے 2 سری لنکا، 3 انگلینڈ اور 2 نیوزی لینڈ کے خلاف کھیلے جائیں گے۔ پاکستان کرکٹ بورڈ نے نیشنل مینز اور خواتین کرکٹ ٹیموں کی آئندہ 12 ماہ کی مصروفیات پر مشتمل بین الاقوامی کرکٹ سیزن کی تفصیلات جاری کردی جس کے مطابق مئی 2022 سے مئی 2023 تک پانچ مینزغیرملکی کرکٹ ٹیمیں پاکستان کا دور ہ کریں گی۔انگلینڈ کی قومی کر کٹ ٹیم رواں سال اکتوبر میں پاکستان کا دورہ کرے گی جس میں وہ پاکستان کے خلاف سات ٹی ٹوئنٹی میچوں کی سیریز کھیلے گی دورہ 15 اکتوبرسے 15 نومبر پر محیط ہوگا، نومبرسے دسمبر انگلینڈ مینز ٹیم ایک بار پھردورہ پاکستان میں3 ٹیسٹ میچز کھیلے گی ،اگلے سال جنوری میں ویسٹ انڈیز کی ٹیم3 ٹی ٹوئنٹی انٹرنیشنل میچز کھیلنے پاکستان آئے گی۔ دسمبرسےجنوری نیوزی لینڈ مینز ٹیم دورہ پاکستان میں2 ٹیسٹ اور 3 ون ڈےانٹرنیشنل میچز کھیلے گی ، آئندہ سال اپریل سے مئی نیوزی لینڈ مینز ٹیم پاکستان میں 5 ون ڈے انٹرنیشنل اور 5ٹی ٹوئنٹی میچز کھیلنے دوبارہ آئے گی۔ آئی سی سی مینز کرکٹ ورلڈکپ سپر لیگ میں شامل 12 ون ڈے انٹرنیشنل میچز ویسٹ انڈیز، سری لنکا، نیوزی لینڈ اور نیدرلینڈزکے خلاف کھیلے جائیں گے۔ اس عرصہ کے دوران قومی کرکٹ ٹیم اے سی سی ٹی ٹوئنٹی ایشیا کپ اور آئی سی مینز ٹی ٹونٹی ورلڈکپ میں بھی شرکت کرے گی۔ ٹی ٹوئنٹی طرز کی کرکٹ میں ان دو ایونٹس کے علاوہ پاکستان کرکٹ ٹیم آئندہ 12 ماہ میں انگلینڈ کے خلاف 7 ، ویسٹ انڈیز کے خلاف 3 اور نیوزی لینڈ کے خلاف 5 ٹی ٹونٹی انٹرنیشنل میچز بھی کھیلے گی۔ نیوزی لینڈ کی ٹیم اپریل 2023 میں دورہ پاکستان میں پانچ ون ڈےانٹرنیشنل سمیت پانچ ٹی ٹوئنٹی انٹرنیشنل میچز بھی کھیلے گی۔ دوسری جانب قومی خواتین کرکٹ ٹیم کو بھی آئندہ 12 ماہ میں چیلجنگ کرکٹ کھیلنے کو ملے گی، جہاں انہیں اپنی صلاحیتوں کے اظہار کا بہترین موقع ملے گا۔اس دوران قومی خواتین کرکٹ ٹیم بسمہ معروف کی قیادت میں 8انٹرنیشنل سیریزکھیلے گی۔ان انٹرنیشنل سیریز میں آئی سی سی ویمنز چیمپئن شپ، آئی سی سی ویمنز ٹی ٹوئنٹی ورلڈکپ، کامن ویلتھ گیمز، ایشین گیمزاور اے سی سی ویمنز ٹی ٹونٹی ایشیا کپ بھی شامل ہیں۔ سری لنکا کی خواتین کرکٹ ٹیم تین ون ڈے انٹرنیشنل میچز کھیلنے مئی میں پاکستان آئے گی۔ ٹیم ستمبر میں چین روانہ ہوگی، جہاں وہ ایشین گیمز میں شرکت کرے گی۔ پھر اکتوبر نومبر میں آئرلینڈ کی خواتین کرکٹ ٹیم پاکستان کا دورہ کرے گی۔ پاکستان شاہینز کی بھی 19ویں ایشین گیمز میں شرکت یقینی ہے، تاہم پی سی بی پاکستان شاہینز کے لیے مزید کرکٹ سیریز کے انعقاد کے لیے کوشاں ہے۔
