اوورسیز پاکستانیوں کی ووٹنگ کے طریقہ کار پر آئینی ترمیم کیخلاف درخواست مسترد

اسلام آباد ہائی کورٹ نے اوورسیز پاکستانیوں کے لیے ووٹنگ کے طریقہ کار پر آئینی ترمیم کے خلاف درخواست مسترد کر دی۔

چیف جسٹس اطہر من اللّٰہ نے درخواست گزار وکیل کے دلائل سن کر درخواست خارج کی۔

اسلام آباد ہائی کورٹ نے ریمارکس میں کہا کہ امید ہے کہ الیکشن کمیشن اپنی آئینی ذمے داری پوری کرے گا۔

دورانِ سماعت درخواست گزار کے وکیل نے کہا کہ اوورسیز پاکستانیوں کے ووٹ کا حق تسلیم کیا جاتا ہے لیکن دیا نہیں جاتا، قیامت تک سمندر پار پاکستانیوں کو ووٹ کا حق نہیں دیا جائے گا۔

درخواست گزار کے وکیل نے یہ بھی کہا کہ پارلیمنٹ نے بد نیتی سے سمندر پار پاکستانیوں کے ووٹ کا معاملہ دوبارہ صفر پر پہنچا دیا ہے۔

چیف جسٹس اطہر من اللّٰہ نے درخواست گزار کے وکیل پر اظہارِ برہمی کرتے ہوئے کہا کہ پارلیمنٹ کی قانون سازی کو بد نیتی نہیں کہا جا سکتا۔