فرمان الہی
نماز کے اوقات
کراچی (اسٹاف رپورٹر) انگلینڈ کی کرکٹ ٹیم پاکستان کے خلاف سات ٹی ٹوئنٹی انٹر نیشنل میچوں کی سیریز کھیلنے جمعے کو کراچی پہنچ رہی ہے، ایشیا کپ فائنل میں شکست کے بعد اگلے ماہ ورلڈکپ سے قبل یہ سیریز پاکستان کیلئے بڑا امتحان ہوگی۔ ہوم سائیڈ کو میگا ایونٹ سے قبل اپنی خامیوں اور کمزوریاں دور کرنے کا موقع ملے گا۔پاکستانی ٹیم بھی جمعے کو کراچی میں رپورٹ کرے گی۔ نیشنل اسٹیڈیم ابتدائی چار میچوں کی میزبانی کرےگا۔ نیشنل اسٹیڈیم میں پچوں کی تیاری اور صفائی کے علاوہ دیگر تیاریاں جاری ہیں۔ پاک انگلینڈ ٹی ٹوئنٹی سیریز کی تیاریوں کے سلسلے میں نیشنل اسٹیڈیم میں چار پریکٹس وکٹیں بھی تیار کی گئی ہیں۔ چھ ماہ قبل مارچ میں آسٹریلیا کے خلاف سیریز کے بعد سے نیشنل اسٹیڈیم میں کوئی میچ نہیں کھیلا گیا ہے اس دوران اسکوائر کی کھدائی کرکے پچوں میں نئی مٹی ڈالی گئی ہے، کرسیوں کو پانی سے دھویا جارہا ہے جبکہ پورے اسٹیڈیم میں رنگ و روغن کیا گیا ہے ۔ پہلا میچ منگل کو نیشنل اسٹیڈیم میں کھیلا جائے گا۔
