• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

شہباز شریف منگل سے چین کا دو روزہ دورہ کرینگے

آج کا اخبار
اہم خبریں
27 اکتوبر ، 2022
اسلام آباد ( نمائندہ جنگ) وزیر اعظم شہباز شریف یکم نومبر سے چین کا دو روزہ دورہ کریں گے، وزیر خارجہ بلاول بھٹو سمیت اعلیٰ سطح کا وفد بھی ان کے ہمراہ ہوگا، وزیر اعظم کو اس دورے کی دعوت عوامی جمہوریہ چین کی ریاستی کونسل کے وزیر اعظم لی کی چیانگ نے دی ہے۔ اس سال اپریل میں وزارت عظمیٰ کا عہدہ سنبھالنے کے بعد وزیر اعظم شہباز شریف کا چین کا پہلا دورہ ہوگا، وزیراعظم نے 16ستمبر 2022کو ازبکستان میں چین کے صدر شی جن پنگ سے ملاقات کی تھی۔ چین کی کیمونسٹ پارٹی کی تاریخی 20ویں نیشنل کانگریس کے اجلاس کے بعد وزیر اعظم چین کا دورہ کرنے والے اولین رہنماؤں میں شامل ہیں۔ بیان کے مطابق وزیراعظم کا دورہ پاکستان اور چین کے درمیان قیادت کی سطح کے تبادلوں کے تسلسل کا اظہار ہے۔ وزیر اعظم دورہ کے دوران صدر شی جن پنگ سے ملاقات کریں گے اور وزیر اعظم لی کی چیانگ کے ساتھ وفود کی سطح پر بات چیت کریں گے۔ دورے کے دوران فریقین باہمی سٹریٹجک تعاون کی شراکت داری کا جائزہ لیں گے اور علاقائی اور عالمی پیش رفت پر خیالات کا تبادلہ کریں گے۔
اہم خبریں سے مزید