تحریک انصاف ضلع صوابی میں شدید اختلافات، اسد قیصر کیخلاف بغاوت

صوابی( نمائندہ جنگ) تحریک انصاف ضلع صوابی میں شدید اختلافات سامنے آگئے پارٹی کے متعدد رہنماؤں اور کارکنوں نے واضح طور پر کہا ہے کہ چند رہنماؤں کے مسلط کردہ فیصلے اور ڈکٹیشن کی پالیسیاں انہیں قبول نہیں،اسد قیصر کیخلاف بغاوت کردی گئی.

سابق سپیکر اور شہرام ترکئی کی پالیسیوں سے کارکنوں میں احساس محرومی بہت بڑھ گیا۔

 پارٹی کے ذرائع نے اتوار کو یہاں بتایاکہ پارٹی کارکنوں نے تحصیل ٹوپی کے علاقوں میں حالیہ مختلف اجلاسوں میں بتایا کہ گزشتہ نو سالوں میں سابق سپیکر قومی اسمبلی اسد قیصر پارٹی کی پالیسیوں پر حاوی رہے اور شہرام خان ترکئی کے بعد سے سابق صوبائی وزیر تعلیم و صحت نے پارٹی میں شمولیت اختیار کی تو انہوں نے بھی انہیں کوئی اہمیت نہ دی جس سے حامیوں میں احساس محرومی پیدا ہوا۔

 ذرائع کا کہنا ہے کہ تین روز قبل اسد قیصر نے اسلام آباد میں اپنے اہم حامیوں سے اہم ملاقات کی تھی، اس اجتماع کا مقصد یہ تھا کہ ان کی مخالفت کرنے والے رہنماؤں اور کارکنوں کی رفتار کا کیسے مقابلہ کیا جائے اور وہ کسی بھی حد تک جانے کے لیے تیار ہیں۔