فرمان الہی
نماز کے اوقات
کراچی (اسٹاف رپورٹر) پاکستان سپر لیگ8 میں دائیں ہاتھ کے فاسٹ بولر احسان اللہ کی شکل میں پاکستان کو ایک اور فیو چر اسٹار ملنے کی توقع ہے۔انہوں نے ایچ بی ایل پی ایس ایل میں دھماکے دار انٹری کی ہے۔ پی ایس ایل کے آغاز سے قبل ملتان سلطانز کے کپتان محمد رضوان نے انکشاف کیا تھا کہ احسان اللہ ٹورنامنٹ کا نیا اسٹار ثابت ہوگا۔ بدھ کو ملتان میں احسان اللہ نے چار اوورز کے اسپیل میں کوئٹہ گلیڈی ایٹرز کی آدھی ٹیم کا صفایاکردیا۔ اپنے دور کے اسپیڈ اسٹار وقار یونس بھی احسان اللہ کی تعریف کئے بغیر نہ رہ سکے۔ وقار یونس نے کہا کہ یہ نوجوان 145 سے 150 کی رفتار سے بولنگ کررہا ہے، ایسی اسپیڈ میں نئی گیند بیٹر کے لئے ڈراؤنا خواب ہوتی ہے۔ اگر میں کپتان ہوتا تو احسان اللہ سے چاروں اوورز ایک ساتھ کروادیتا کیوں کہ ایسے بولر سے بیٹسمین سنبھلنے کی کوشش میں وکٹ کھو دیتے ہیں۔20 سالہ احسان اللہ کا تعلق خیبر ایجنسی سے ہے۔ لاہور قلندرز کے خلاف احسان اللہ نے37 رنز دے کر دووکٹ حاصل کئے تھے۔ انہوں نے کے پی کے کی جانب سے پاکستان کپ میں21وکٹ حاصل کئے تھے۔
