فرمان الہی
نماز کے اوقات
کراچی ( اسٹاف رپورٹر) پشاور زلمی کے فاسٹ بولر وہاب ریاض نے کہا ہے کہ سیاست میں آنے کا مقصد کر کٹ کے ساتھ ساتھ دیگر کھیلوں میں بہتری کے لئے کچھ کرنا ہے۔ 6 چھکے پڑنے کی مجھے کوئی پرواہ نہیں، جب 6 چھکے پڑے تھے تب بھی دکھ نہیں ہوا تھا اوراب بھی دکھ نہیں ہے،6 چھکوں کا کریڈٹ افتخار احمد کو جاتا ہے، افتخار احمد بھرپور فارم میں ہیں 6 چھکے مارنا آسان نہیں ہے۔ ایک انٹرویو میں کہا کہ کرکٹرز کی ڈیلز، مراعات اور شہرت زیادہ ہوتی ہے، ہاکی اسکواش اور بیڈ منٹن، اولمپکس اور دیگر گیمز کیلئے ہمیں بہت کچھ کرنے کی ضرورت ہے، مجھے سیاست میں آنے کا موقع ملا تو میں نے اس کا فائدہ اٹھانے کی کوشش کی، پی ایس ایل ایسا پلیٹ فارم ہے کہ ہر کوئی پرفارم کر کے سلیکٹرز کی توجہ حاصل کرنا چاہتا ہے، میرے لیے یہ چیز اہم نہیں کہ کون پرفارم کر رہا ہے مجھے دیکھنا ہے کہ میں کیسا پرفارم کرتا ہوں، میرے کھیلنے کا مقصد یہی ہے کہ میں نے کم بیک کرنا ہے، باقی سب کی طرح میں بھی پاکستان کیلئے کھیلنا چاہتا ہوں۔ ان کا کہنا تھا کہ میں ابھی فٹ ہوں کرکٹ کھیل رہا ہوں اب مجھے جہاں موقع ملے وہاں پرفارم کرنا ہے، لیگز کھیل کر میں بھی خود کو متحرک رکھتا ہوں۔ انہوں نے کہا کہ جس میچ میں چھ چھکے لگےوہ ایک نمائشی میچ تھا اس میں ڈومیسٹک میچ کی طرح شدت نہیں ہوتی، دیکھنا یہ ہو گا کہ پی ایس ایل 8 میں کیا کارکردگی ہوتی ہے۔ پشاور زلمی کا آغاز اچھا ہوا ہے، تسلسل کو قائم رکھنا ہے، پہلے میچ میں کامیابی سے اعتماد ملا ہے اور کامبی نیشن کا بھی پتہ چلا ہے۔
