فرمان الہی
نماز کے اوقات
جدہ (نیوز ایجنسیاں، مانیٹرنگ ڈیسک) سابق وزیراعظم نوازشریف اور سعودی ولی عہد محمد بن سلمان کے درمیان اہم ملاقات ہوئی ہے جس میں دو طرفہ تعلقات سمیت پاکستان کو درپیش مسائل پر تفصیلی تبادلہ خیال کیا گیا، ملاقات مکہ مکرمہ کے شاہی محل میں ہوئی جو نصف گھنٹے تک جاری رہی، اس موقع پر محمد بن سلمان نے کہا ہے کہ سعودی عوام اور میں پاکستان کے عوام اور حکومت کیساتھ تعلقات کو قدر کی نگاہ سے دیکھتے ہیں، دونوں برادر ممالک تعاون جاری رکھیں گے، نوازشریف کا کہنا تھا کہ سعودی اور پاکستانی عوام تسبیح میں پروئے ہوئے ہیں، مریم اورنگزیب کا کہنا ہے کہ دونوں رہنماؤں کے درمیان ملاقات مثبت رہی، اس موقع پر نوازشریف نے سعودی قیادت کیلئے نیک تمناؤں کا اظہار کیا اور مشکل وقت میں پاکستان کی مدد کرنے پر شکریہ ادا کیا۔مسلم لیگ (ن) کے ذرائع نے ملاقات کی تصدیق کرتے ہوئے بتایا کہ جدہ کے شاہی محل میں ہونے والی ملاقات میں پاکستان کے مسائل اور ان کے حل پر تفصیلی گفتگو ہوئی ہے اور نواز شریف نے ہمیشہ کی طرح اس بار بھی پاکستان کی مالی مدد اور تعاون پر خصوصی طور پر سعودی ولی عہد کا شکریہ ادا کیا۔ ذرائع کے مطابق ملاقات میں ن لیگ کی چیف آرگنائزر مریم نواز بھی موجود تھیں۔ذرائع کا کہنا ہے کہ محمد بن سلمان اور نواز شریف کی ملاقات مثبت اور تعمیری رہی جبکہ شاہی محل میں ہونے والی ملاقات میں پاکستان کے مسائل اور ان کے حل پر تفصیلی گفتگو ہوئی اور سعودی ولی عہد نے کہا کہ وہ اور سعودی عوام پاکستان کی عوام اور حکومت کے ساتھ اپنے تعلقات کو قدر کی نگاہ سے دیکھتے ہیں دونوں برادر ممالک ایک دوسرے سے تعاون جاری رکھیں گے۔ دوسری جانب وفاقی وزیر اطلاعات مریم اورنگزیب نے قائد پارٹی نواز شریف کی سعودی عرب، ولی عہد شہزادہ محمد بن سلمان سے ملاقات کی تصدیق کرتے ہوئے کہا کہ دونوں رہنماؤں کے درمیان ملاقات مثبت رہی ،ملاقات میں مریم نواز بھی موجود تھیں، مریم اورنگزیب کا کہنا تھا کہ قائدین نے سعودی پاک برادرانہ تعلقات کے مزید فروغ اور پاکستان کو درپیش مسائل کے حل پر بات کی،مسلم لیگ (ن) کے قائد نوازشریف نے سعودی قیادت کے لئے نیک تمناؤں کا اظہار کیا اور پاکستان کی مشکل وقت میں مدد کرنے پر سعودی حکومت کا شکریہ ادا کیا۔
