فرمان الہی
نماز کے اوقات
اسلام آباد( نمائندہ جنگ ) قومی اسمبلی کی آڈیو لیکس کی تحقیقاتی کمیٹی نے عدم حاضری پر جسٹس (ر) ثاقب نثار کے بیٹے نجم ثاقب کے سمن جاری کردیے اور اگلی پیشی پر نہ آنے پر وارنٹ جاری کرنے کا عندیہ دے دیا جبکہ اس کے بینک اکائونٹس کی تفصیلات بھی طلب کرلی ہیں۔آڈیو لیکس کی تحقیقات کرنے والی خصوصی پارلیمانی کمیٹی کا اجلاس منعقد ہوا جس میں سابق چیف جسٹس ثاقب نثار کے بیٹے کی آڈیو لیکس کا معاملہ بھی زیر بحث آیا۔ کمیٹی کے چیئرمین روحیل اصغر نے کہا کہ نجم ثاقب کو صفائی کا موقع دے رہے ہیں سزا نہیں، چیف جسٹس کا بیٹا بھی خود کو چیف جسٹس سمجھتا ہے، کمیٹی اجلاس میں شریک ہونا وہ اپنی ہتک عزت سمجھتے ہیں۔کمیٹی کی رکن ناز بلوچ نے کہا کہ سابق چیف جسٹس کے بیٹے خود کو چیف جسٹس سجھتے ہیں، اس کمیٹی کے احترام میں انہیں آنا چاہیے تھا۔کمیٹی نے نجم ثاقب سمیت دیگر دو افراد کے 6 ماہ کے بینک اسٹیٹمنٹ طلب کرلیے اور وزات خزانہ کو ہدایت دی کہ بینک کی تفصیلات 15دن کے اندر پیش کی جائیں۔
