• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اقتصادی رابطہ کمیٹی کا اجلاس، سندھ کی شوگر ملوں کو 32 ہزار میٹرک ٹن چینی برآمد کی اجازت

آج کا اخبار
اہم خبریں
24 جون ، 2023
اسلام آباد(نمائندہ جنگ) کابینہ کی اقتصادی رابطہ کمیٹی نے سندھ ہائیکورٹ کے فیصلے کی روشنی میں 12 جون کے بعد باقیماندہ کوٹہ کے تحت سندھ کی شوگرملوں کو 60 یوم کے اندر 32 ہزار میٹرک ٹن چینی کی برآمد کی اجازت دیدی،اجلاس میں کئی وزارتوں اور ڈویژنز کیلئے تکنیکی ضمنی گرانٹس کی منظوری بھی دیدی ،کمیٹی کااجلاس وزیر خزانہ سینیٹر محمد اسحاق ڈارکی زیرصدارت ہوا اجلاس میں وزیر تجارت سیدنویدقمر، وزیر مملکت مصدق ملک،معاون خصوصی طارق باجوہ، وزیراعظم کے رابطہ کار برائے معیشت و توانائی بلال اظہرکیانی، وفاقی سیکرٹریز اور سینئر افسران نے شرکت کی، ای سی سی میں وزارت تجارت کی جانب سے سندھ میں شوگر ملوں کیلئے چینی کی برآمد کی مدت میں اضافہ سے متعلق سمری پیش کی گئی ای سی سی نے سندھ ہائیکورٹ کے فیصلے کی روشنی میں 12 جون کے بعد باقیماندہ کوٹہ کے تحت 60 یوم کے اندر 32 ہزار میٹرک ٹن چینی کی برآمد کی اجازت دیدی ، اجلاس میں وزارت ریلویز کی جانب سے پاکستان ریلویز کے واجبات اور عملہ کوتنخواہوں کی ادائیگی سے متعلق گرانٹ کے تحت اضافی فنڈز کی فراہمی سے متعلق سمری پیش کی گئی، ای سی سی نے شارٹ فال کے مسئلہ سے نمٹنے اور ریلویز کے آپریشنز بلاتعطل جاری رکھنے کیلئے اضافی اڑھائی ارب روپے کی اضافی گرانٹ دینے کافیصلہ کیاہے ای سی سی میں رواں مالی سال میں صوبوں کے مصارف اور مستقبل کی ضروریات کی مد میں وزارت خزانہ کیلئے 250 ارب روپے، صوبوں میں مختلف ترقیاتی منصوبوں کی مد میں وزارت ہاؤسنگ اینڈ ورکس کیلئے 3 ارب 62کروڑ80ہزار روپے، ای آر ای واجبات کی مد میں وزارت ہاؤسنگ کیلئے 172 ملین روپے، 16 ترقیاتی منصوبوں کی مد میں وزارت ہاؤسنگ کیلئے 1200 ملین روپے اور ریکوڈک پراجیکٹ میں بلوچستان منرل ریسورسز لمیٹڈ کے ضمن میں حکومت پاکستان کی کمٹمنٹ کے طور پر وزارت توانائی کیلئے 1238 ملین روپے کی تکنیکی ضمنی گرانٹس کی منظوری دیدی۔
اہم خبریں سے مزید