• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

برکس میں ارجنٹائن، ایتھوپیا، ایران، سعودیہ، مصر اورامارات شامل

آج کا اخبار
اہم خبریں
25 اگست ، 2023
کراچی، ریاض (نیوز ڈیسک، شاہد نعیم ) برازیل، روس، بھارت، چین اورجنوبی افریقہ پر مشتمل ابھرتی ہوئی معیشتوں کے گروپ برکس کے رہنماؤں نےگزشتہ روز جوہانسبرگ میں جاری کانفرنس کے آخری دن 6نئے ملکوں کو گروپ میں شامل کرنے کا اعلان کیا۔ رہنماؤں نے اتفاق رائے سے اعلان کیا کہ ارجنٹینا، ایتھوپیا، ایران، سعودی عرب، مصر اور متحدہ عرب امارات یکم جنوری سے برکس کے مکمل رکن ہوں گے۔چین کے صدر شی جن پنگ نے کہا ہے کہ یہ توسیع برکس تعاون کا ایک نیا نکتہ آغاز ہے۔ چین پاکستان کو بھی شامل کرنے کا خواہاں ہے تاہم اطلاعات کے مطابق بھارت اس کی مخالفت کررہا ہے ۔ تفصیلات کے مطابق غیر مغربی ملکوں پر مشتمل اور دنیا کی ایک چوتھائی معیشت کی نمائندگی کرنے والے برکس کے سب سے طاقت ور رکن چین کے صدر شی جن پنگ نے کہا کہ اراکین کی تعداد میں توسیع کا فیصلہ تاریخی ہے۔انہوں نے کہا کہ اس سے برکس تعاون کے طریقہ کار میں نئی قوت آئے گی اور عالمی امن اور ترقی کو مزید تقویت ملے گی۔ بھارتی وزیر اعظم نریندر مودی نے نئے رکن ملکوں کو مبارک باد دیتے ہوئے کہاکہ بھارت نے ہمیشہ برکس کی توسیع کی حمایت کی ہے۔
اہم خبریں سے مزید