نواز شریف سعودیہ پہنچ چکے فلسطینیوں کیلئے بات کرینگے، خرم دستگیر

کراچی (ٹی وی رپورٹ) جیو کے پروگرام ’’کیپٹل ٹاک‘‘میں میزبان حامد میر سے گفتگو کرتے ہوئے ترجمان تحریک انصاف علی محمد خان نے کہا ہے کہ آج فلسطینیوں کے ساتھ کھڑے نہ ہونے والے کوفیوں کی صفوں میں ہوں گے، حماس نے اسرائیل پر حملہ کر کے فلسطینی مسلمانوں کیلئے مسائل پیدا نہیں کیے،مجھے فخر ہے میرا لیڈر عمران خان کشمیر اور فلسطین پر چٹان کی طرح کھڑا تھا،ن لیگ کے رہنما خرم دستگیر خان نے کہا کہ نواز شریف سعودی عرب پہنچ چکے ہیں توقع ہے وہ وہاں فلسطینیوں کے حقوق کیلئے بات کریں گے، فلسطین میں بھی وہی صورتحال ہے جو کشمیر میں ہے، مغربی دنیا جس حق کی وجہ سے یوکرین کو جدید اسلحہ فراہم کررہی ہے فلسطینی اور کشمیری اسی حق کا اعادہ کرتے ہیں، آج یوکرین، فلسطین اور کشمیر ایک ہی لائن میں کھڑے ہیں۔ ترجمان تحریک انصاف علی محمد خان نے کہا کہ حماس نے اسرائیل پر حملہ کر کے فلسطینی مسلمانوں کیلئے مسائل پیدا نہیں کیے،آج فلسطینیوں کے ساتھ کھڑے نہ ہونے والے کوفیوں کی صفوں میں ہوں گے، آخری لمحات میں قائداعظم کے لبوں پر کشمیر، مہاجرین اور فلسطین کے الفاظ تھے، ریاست پاکستان 75سال سے فلسطین کے حوالے سے قائداعظم کے نصب العین پر کھڑی ہے، حکومت کو فلسطین کی موجودہ صورتحال پر اپنا موقف واضح کرنا چاہئے، مجھے فخر ہے میرا لیڈر عمران خان کشمیر اور فلسطین پر چٹان کی طرح کھڑا تھا، ہم یہودیوں کے نہیں صیہونی سوچ کے خلاف ہیں۔