فرمان الہی
نماز کے اوقات
کراچی (اسٹاف رپورٹر) پریذیڈنٹ ٹرافی کرکٹ ٹورنامنٹ کے چوتھے راؤنڈ کے تیسرے دن جمعے کواسٹیٹ بینک نے واپڈا کو 9 وکٹوں سے شکست دیدی۔ سعید علی اور سعد خان نے سنچریاں بنائیں ۔ اسٹیٹ بینک اسٹیڈیم میں اسٹیٹ بینک کو صرف 41 رنز کا ہدف ملا تھا جو اس نے ایک وکٹ پر حاصل کرلیا۔ ٹورنامنٹ میں اسٹیٹ بینک کی دوسری کامیابی ہے۔ نیشنل بینک اسٹیڈیم میں کے آر ایل نے ایس این جی پی ایل کے خلاف اپنی دوسری اننگز میں نو وکٹ پر 299 رنز بنائے۔ اسے 231 رنز کی مجموعی برتری حاصل ہوگئی ہے۔ عمران رفیق نے 78 اور شرون سراج نے 52 رنز اسکور کیے۔ یوبی ایل اسپورٹس کمپلیکس میں ہائر ایجوکیشن کمیشن کو غنی گلاس کے خلاف 479 رنز کا ہدف ملا ہے۔ تیسرے دن کھیل کے اختتام پر اس نے 6 وکٹوں پر 276 رنز بنائے تھے۔ سعد خان نے 104 رنز اسکور کیے۔ عدیل میو 75 رنز بناکر ناٹ آؤٹ ہیں۔ محمد رمیز تین وکٹیں حاصل کرچکے ہیں۔ انہوں نے پہلی اننگز میں پانچ وکٹیں حاصل کی تھیں۔ اس سے قبل غنی گلاس نے دوسری اننگز 8 وکٹوں کے نقصان پر446 رنز پر ڈکلیئر کردی تھی ۔ سعید علی 118 رنز بناکر آؤٹ ہوئے۔ محمد عرفان 64 رنز بناکر ناٹ آؤٹ رہے۔ شہباز جاوید نے 50 رنز کی اننگز کھیلی۔
