• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

گھوٹکی، قبائلی تصادم میں 3 بھائی سمیت 6 افراد جاں بحق، 4 زخمی

آج کا اخبار
اہم خبریں
21 جنوری ، 2024
سکھر ،میر پور ماتھیلو(بیورورپورٹ، نامہ نگار) قبائلی تصادم نے مزید 6جانیں لے لیں، گھوٹکی میں قبائلی ی جھگڑے میں ایک قبیلے کے موٹرسائیکل سوار مسلح افراد نے گاؤں کے ایک گھر پر حملہ کرکے 3 بھائیوں اور3مہمانوں سمیت 6افراد کو قتل اور 4 افراد کو زخمی کردیا، ملزمان فرار ہونے میں کامیاب ہوگئے۔اوند اور سندرانی قبائل میں جاری تنازع میں اب تک 20سے زائد افراد لقمہ اجل بن چکے ہیں۔ پولیس کے مطابق گھوٹکی میں میرپور ماتھیلو کے گاؤں مسکان ساوند میں موٹر سائیکلوں پر سوار سندرانی قبیلے کے مسلح افراد نے حملہ کرکے فائرنگ شروع کردی جس سے 6افراد جاں بحق جبکہ 4افراد زخمی ہوگئے ہیں، جاں بحق افراد میں شیر علی، نصیب اللہ ، علی رضا ملک، امیر علی، عبدالرحمٰن، فیض محمد ساوند شامل ہیں قتل کئے گئے افراد میں 3سگے بھائی اور3مہمان تھے۔ ملک برادری کے 3مہمان انور شاہ کا میلا دیکھنے آئے ہوئے تھے زخمیوں اور لاشوں کو میرپور ماتھیلو اسپتال منتقل کیا گیا ہے ساوند اور سندرانی قبائل میں جاری تنازع میں اب تک 20 سے زائد افراد لقمہ اجل بن چکے ہیں، ملزمان کچے میں فرار ہوگئے ہیں پولیس ملزمان کی گرفتاری کے لئے کوششیں کررہی ہے۔میرپورماتھیلو کے نامہ نگار کے مطاق ہفتےکی صبح ساوند سندرانی قبیلےکےدیرینہ جھگڑےپرگوٹھ مسکان ساوند پر سندرانی برادری کے متعدد مسلح افرادنےایک گھر پر اندھا دھند فائرنگ کرکے6 افراد کو موت کی نیند سلا دیا،ہلاک اورزخمیوں کوڈی ایچ کیو اسپتال منتقل کیاگیا2زخمیوں کی حالت نازک بتائی جاتی ہے۔
اہم خبریں سے مزید