فرمان الہی
نماز کے اوقات
لاہور(نمائندہ جنگ، ایجنسیاں)پاکستان مسلم لیگ (ن) کی سینئر نائب صد ر و چیف آرگنائزر مریم نواز نے کہا ہے کہ سیاسی مخالفین کو رلانے کی خواہش رکھنے والوں کی وجہ سے آج پورا پاکستان رو رہا ہے، عوام کو پتا ہے کس نے کام اور کس نے انتقام لیا، نااہلی کا اثر سب نے دیکھا اور بھگتا،8 فروری کو ووٹ صرف نوازشریف اور شیر کو ملے گا، ہر طرف شیر کی آواز ہوگی۔ ان خیالات کا اظہار انہوں نے پارٹی سیکرٹریٹ ماڈل ٹاؤن میں این اے 119 میں انتخابی مہم ٹیم کے اجلاس سے خطاب کرتے ہوئے کیا۔علاوہ ازیں قومی اسمبلی کے لاہور سے حلقہ این اے 119کی نشست پر پی ٹی آئی امیدوار مسلم لیگ (ن) کی مریم نواز شریف کے حق میں دستبردار ہوگئے۔پی ٹی آئی کے ٹکٹ ہولڈر مہر محمد وسیم اپنے ہزاروں کارکنوں سمیت مسلم لیگ (ن) میں شامل ہوگئے۔ دوسری جانب سابق وزیراعلیٰ پنجاب حمزہ شہباز نے کہا کہ پی ٹی آئی نے نواز شریف سمیت ساری لیگی قیادت سے انتقام لیا،جھوٹے مقدمات پر جیلوں میں رکھا، ایک پائی کرپشن ثابت نہ ہوئی، 8 فروری کو انتخاب عوام کی تقدیر کا فیصلہ کریگا، ہم نے ملک کو بحران سے بچانے کیلئے اپنی سیاست داؤ پر لگائی۔ تفصیلات کے مطابق مریم نواز نے پارٹی سیکرٹریٹ ماڈل ٹاؤن میں این اے 119 میں انتخابی مہم ٹیم کے اجلاس سے خطاب کرتے ہوئے کہا کہ این اے 119 کو کبھی نہیں چھوڑوں گی، اس حلقہ میں رہنے والے ہر فرد اور گھرانے کی ترقی میری ذمہ داری ہے، چھ سال ظلم وجبر کے دور میں آپ نے میرا ساتھ دیا، عاجزی سے کہتی ہوں کہ ملک وقوم کی خدمت کی ایک نئی تاریخ رقم کرنی ہے۔ اس موقع پر سینیٹر پرویز رشید، علی پرویز ملک، خواجہ عمران نذیر ، ملک وحید اور دیگر عہدیدار وں کے علاوہ کارکنوں اور خواتین کی بڑی تعداد شریک تھی۔مریم نواز نے کہاکہ 25 جنوری کو حلقہ این اے 119 میں آپ سے ملنے آؤں گی، ہر کارکن نواز شریف اور مریم نوازشریف ہے، میں اپنے آپ کو لیڈر نہیں سمجھتی ہوں، عوام کی خدمت کے لئے نکلی ہوں، ہر گھر کا دروازہ کھٹکھٹانا چاہتی ہوں، آپ سب میری ذمہ داری ہیں، نوازشریف کا ترقی کا پیغام ہر گھر تک پہنچائیں گے۔ انہوں نے کہا کہ جس جماعت میں اتنے شیر اور شیرنیاں ہوں، اسے کوئی فتح سے نہیں روک سکتا، اللّٰہ تعالی مسلم لیگ (ن) 8 فروری کو ملک گیر فتح عطا فرمائے۔ علاوہ ازیں سابق وزیراعلیٰ پنجاب حمزہ شہباز نے کہا کہ پی ٹی آئی نے نواز شریف سمیت ساری لیگی قیادت سے انتقام لیا،جھوٹے مقدمات پر جیلوں میں رکھا،ایک پائی کرپشن ثابت نہ ہوئی۔لاہور این اے 118 میں انتخابی دفتر کے افتتاح کے موقع پرورکرز کنونشن سے خطاب کرتے ہوئے حمزہ شہباز نے کہا کہ عمران نیازی نے ملک کا دھڑن تختہ کردیا تھا ہم نےاپنی سیاست کو داؤ پر لگا کر ملک کو دیوالیہ ہونے سے بچایا اس کیلئے شہباز شریف نے دن رات محنت کی اگر ایسا نہ ہوتا تو ایسا نہ ہوتا تو پٹرول ایک ہزار روپے لیٹر ہوتا راشن کارڈ بنتے، روٹی کیلئے گھر گھر لڑائی ہوتی۔ حالات اب یہ ہیں کہ گیس اور بجلی کے بل نے ہر گھر میں پریشانی کا سماں پیدا کیا ہوا ہے۔ حمزہ شہباز نے مزید کہا کہ 8 فروری کا دن شیر کی فتح کا سورج طلوع ہوگا۔ حمزہ شہباز کا کہنا تھا کہ کسان کو مضبوط کرنا ہے تب ہی پاکستان خوشحال ہوگا حکومت آئی تو دیامر بھاشا ڈیم مکمل کرکے تحفہ دینگے۔ حمزہ شہباز نے کہا کہ 2 سال جھوٹے مقدمے میں جیل میں رکھا گیا عدالت میں نیازی ایک پائی کی کرپشن ثابت نہیں کرسکا۔ انہوں نے کہا کہ مہنگائی کے جن کو بوتل میں بند کرکے دم لیں گے۔ دریں اثناء قومی اسمبلی کے لاہور سے حلقہ این اے 119 کی نشست پر پی ٹی آئی امیدوار مسلم لیگ (ن) کی مریم نواز شریف کے حق میں دستبردار ہوگئے۔ پی ٹی آئی کے ٹکٹ ہولڈر مہر محمد وسیم اور ان کے ساتھیوں نے حلقے میں مریم نواز شریف کی حمایت کا اعلان کر دیا۔ مہر محمد وسیم نے اپنے ساتھیوں سمیت مسلم لیگ (ن) کی سینئر نائب صدر اور چیف آرگنائزر مریم نوازشریف سے ملاقات کی جس میں سینیٹر پرویز رشید، مریم اورنگزیب، علی پرویز ملک، خواجہ عمران نذیر اور دیگر رہنما بھی موجود تھے۔ہر محمد وسیم اور ان کے ساتھی 25 جنوری کو جلسے میں باضابطہ مسلم لیگ (ن) میں شمولیت کا اعلان کریں گے جبکہ مریم نواز شریف بھی 25 جنوری کو جلسے میں شرکت کریں گے۔
