• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

آزاد ارکان اکثریت شو کرکے اپنا وزیراعظم، وزرائے اعلیٰ بنا سکتے ہیں، کنور دلشاد

آج کا اخبار
اہم خبریں
05 فروری ، 2024
لاہور(آصف محمود بٹ ) سابق سیکرٹری الیکشن کمیشن کنور محمد دلشاد نے کہا ہے کہ اگر آزاد امیدواروں اور ان کے ہم خیال امیدواروں کی تعداد169ہو جاتی ہے تو پھر وہ اپنے قائد ایوان کا انتخاب کر سکتے ہیں۔ اگر قائد ایوان کا انتخاب رن آف الیکشن کے ذریعے بھی نہیں ہوتا تو صدر مملکت آئین کے آرٹیکل 58(2)کے تحت اسمبلی کو تحلیل کرنے کے مجاز ہونگے۔ روزنامہ ’’جنگ‘‘ سے گفتگو کرتے ہوئے کنور دلشاد نے کہا کہ ہ آئین میں ایسی کوئی قدغن نہ ہونے کی وجہ سے عام انتخابات میں کامیاب ہونے والے آزاد امیدوار اکثریت ہونے کی بنیاد پر اپنا وزیر اعظم بھی بنا سکتے ہیں۔ کنور دلشاد نے کہا کہ آزاد اراکین اسمبلی اپنی اکثریت کی واضع صورتحال دیکھتے ہوئے صوبے میں بھی اپنا وزیر اعلی منتخب کروا سکتے ہیں۔ انہوں نے کہا کہ آئین کے آرٹیکل 106 کے تحت آزاد ارکان اسمبلی کسی بھی پارٹی میں شمولیت اختیار کرنے کے پابند ہیں جوالیکشن کمیشن سے انتخابی نشان حاصل کرچکی ہو۔ کنور دلشاد نے کہا کہ اگر آزاد اراکین اسمبلی مقررہ وقت میں پارٹی میں شمولیت اختیار نہیں کرتے تو وہ آزاد ہی تصور ہوں گے۔
اہم خبریں سے مزید