فرمان الہی
نماز کے اوقات
لاہور(نمائندگان جنگ) وزیراعلیٰ پنجاب مریم نواز نے کہا ہے کہ نہری پانی کی چوری برداشت نہیں، سدباب کےلیے مؤثر کارروائی کی جائے گی۔تمام کھالے پکے کردینگے۔دریں اثنا ء وزیر اعلیٰ پنجاب مریم نواز شریف نے ماؤں کے عالمی دن پر اپنے پیغام میں کہا ہے کہ سراپا شفقت و عنایت ماؤں کی عظمت کو سلام،مدر ڈے غزہ اور کشمیر کی پرعزم اور حوصلہ مند ماوں کے نام، زندگی کی چلچلاتی دھوپ میں ماں ٹھنڈی چھاوں کی مانند راحت وسکون ہے،علاوہ ازیں وزیر اعلیٰ پنجاب مریم نواز شریف سے صوبائی وزیر اریگیشن کاظم پیرزادہ نے ملاقات کی،جس میں محکمہ انہار کے امور پرتبادلہ خیال کیا گیا- اریگیشن سسٹم کو جدید خطوط پر استوار کرنے کا جائزہ لیا گیا- کاشتکاروں کو ٹیل تک پانی کی بروقت فراہمی کے تجاویز پر غورکیا گیا-صوبے بھر میں کھالوں کو پختہ کرنے کے پروگرام پر پیشرفت کا جائزہ لیاگیا-وزیراعلی مریم نوازشریف نے کہاکہ پہلے مرحلے میں 10ارب کی لاگت سے 1200کھالے پکے کیے جارہے ہیں جبکہ دوسرے مرحلے میں صوبہ بھر میں7ہزار کھالے پکے کیے جائینگے۔انشاء اللہ آئندہ 5سالوں میں کھالوں کو پختہ کردیا جائے گا۔ کھالے پکے ہونے سے نہروں کے ٹیل پر بھی کاشتکاروں کو وافر پانی دستیاب ہوگا۔انہوں نے کہاکہ کسانوں کے لئے سولر ٹیوب ویل پراجیکٹ کا آغاز کرنے جارہے ہیں۔ نہری پانی کی چوری برداشت نہیں، سدباب کیلئے موثر کارروائی کی جائے گی۔صوبائی وزیر اریگیشن کاظم پیرزادہ نے کہاکہ مریم نواز کی قیادت میں کابینہ اور ٹیم عوامی فلاح و بہبود کے لئے دن رات کام کررہی ہے۔انشاء اللہ میاں نواز شریف کے ویژن کے مطابق کاشتکار کی فلاح وبہبود کا مشن پورا کرینگے۔ سینٹر پرویز رشید بھی موقع پر موجود تھے-دوسری جانب وزیر اعلی مریم نواز نے کہا اللہ تعالیٰ نے اپنی محبت کو ماں کی محبت سے تشبیہ دیکر درجہ بلند کردیا۔ماں، سچے جذبے اور رشتے کا نام ہے۔ مائیں خاندان کا سنگ بنیاد اور معاشرت کا ستون ہیں۔ انہوں نے کہا کہ مدر ڈے ماؤں کی غیر معمولی محبت اور قربانیوں کو تسلیم کرنے کا دن ہے۔ مدر ڈے اور ہر دن اپنی عظیم ماں کی کمی محسوس کرتی ہوں۔ ہمیشہ والدہ محترمہ کلثوم نواز شریف کی محبتوں کی شکر گزار رہوں گی۔ والدہ محترمہ کی دعاؤں کی بدولت آج اس منصب پر ہوں۔انہوں نے کہا کہ ماں کی خدمت کو شعار بنانے والے دنیاو آخرت میں سرخرو ہوتے ہیں۔
