وزیراعلیٰ مریم نواز کا وکلاء گرانٹ ایک ارب روپے تک بڑھانے کا اعلان

لاہور(نمائندہ جنگ)وزیراعلی پنجاب مریم نوازشریف نے چھٹی والے دِن بھی اجلاس بلا کر انتظامیہ کوہدایت کی کہ وزیراعظم شہبازشریف کی طرف سے پٹرول میں کمی کا بڑا ریلیف کرایوں میں کمی کی صور ت عوام کو پہنچنا چاہیے-پٹرول کی قیمت میں مجموعی طورپر 35 روپے کمی کے باوجود ٹرانسپورٹ کرایوں میں کمی نہ ہونے پر وزیراعلی پنجاب نے برہمی کااظہار کیا اوروزارت ٹرانسپورٹ، پولیس کو ٹرانسپورٹ کرایوں میں فوری کمی کے لئے آپریشن شروع کرنے ،شکایات اور معائنہ کمیشن کوبھی فوری اقدامات کی ہدایات دیں-وزیراعلی نے حکام کو خبردار کردیا کہ روٹی، کرائے سمیت دیگر اشیاء کی قیمتوں کو سرکاری نرخوں پر قائم رکھنے کو یقینی بنایا جائے، کوتاہی برداشت نہیں ہوگی-وزیراعلی نے عید الاضحی پر آلائشوں کی بروقت صفائی، مویشی منڈیوں میں ڈاکٹرز کی فراہمی اور پانی سمیت دیگر ضروری سہولیات کی دستیابی کی بھی ہدایت کی اورکہاکہ بڑی عید پر صفائی کا معیار وہی ہونا چاہیے جو وزیراعلی شہبازشریف کے دور میں تھا- وزیر اعلی نے ٹھوکر نیاز بیگ پر شدید ٹریفک جام کا بھی سخت نوٹس لیا اور برہمی کااظہار کرتے ہوئے دوبارہ ایسی صورتحال پیدا نہ ہونے کی ہدایت کی-وزیر اعلی نے صوبے بھر میں امن وامان یقینی بنانے کے لئے بھی سخت اقدامات کی ہدایت کی اور کہاکہ تعطیلات کے دوران بھی تمام صورتحال کی ذاتی طورپر نگرانی کروں گی-اجلاس میں صوبائی سیکرٹریز، پولیس اور انتظامیہ کے اعلی حکام نے شرکت کی،وزیراعلیٰ پنجاب سے بار کونسلز کی اپیکس باڈیز کے ارکان نے ملاقات کی-وفاقی وزیر قانون اعظم نذیر تارڑاور احسن بھون بھی موجود تھے-وزیر اعلیٰ نے وکلاء کی فلاح وبہبود کے لئے گرانٹ ایک ارب روپے تک بڑھانے،خاتون وکلا کے لئے بار کونسل میں مخصوص ہال اور ڈے کئیر سنٹر قائم کرنے کا بھی اعلان کیا۔